十一
暑假話咁快就到左尾聲。
我除左參加左自己讀果科個學系搞個o camp之外,仲參加左hall既o camp。
不過入hall camp之前,首先要登記同搬入hall先。
要搬入hall,除左搬屋企入面既個人物品之外,都要睇下有冇啲野遺漏要去買的。所以今日我就約左Jenny出黎行街買下野,順便出去拍下拖,享受下我搬入hall之前最後一次二人世界既約會。
話就話拍住拖去買野,其實都係亂咁行街,諗起有咩想買先至去果啲鋪頭睇下。
對住從來唔計劃約會行程既我,Jenny基本上唔會有乜野怨言,所以我成日都話佢真係一個好順得人意既好女友。
今日行下行下,求其亂咁買下日用品,不知不覺間又去到夜晚,我地求其搵左間茶餐廳就入去食晚餐。
我叫左個男人的浪漫豆腐火腩飯,Jenny就叫左個芝士焗意粉。之後我地就一路開餐,一路傾下計,內容都係啲無聊野啦,講下對大家對大學生活既憧憬,又講下我聽日就搬入hall咁。
「你就開心啦,又住hall又玩幾個o camp。」Jenny一路督住杯凍檸茶既檸檬一路講。
「你都可以試下申請住同埋去o camp架~」我回應。
「唔…咁人地對呢啲真係冇乜興趣吖嘛。況且我聽好多人講,港大啲hall一住hall就一定要玩,仲要玩到好夜又玩到好癲。咁我好難集中精神溫書架。」Jenny一面認真咁講。
又一次覺得慚愧,我都係大學生,但我完全冇諗過讀書啲野。
好快食完飯之後,我又送Jenny返屋企,不過今次佢屋企有人,冇得上去大戰三百個回合了。
Jenny橋住我手臂一路行,傾下計咁唔經唔覺已經到左佢屋企樓下。其實比起拖住佢,我更加鍾意佢橋住我手臂,我覺得咁樣好warm好sweet。
「係呢…」Jenny抬起頭望住我。
「唔?」
「我聽好多人講過,啲情侶一入左唔同既大學就好易分手。」Jenny突然攬一攬住我。「你會唔會唔要我?」
我嚇左一嚇,Jenny又會無端端咁同我講呢啲野既?
唔通佢真係擔心我地既關係同其他一般情侶咁經唔起考驗?
我摸一摸佢啲頭髮,好柔順既觸感。
「傻妹,梗係唔會啦。」
佢抬一抬頭望住我:「你開學之後唔準亂咁識女仔呀!」
唔知點解,一句同去o camp之前差唔多既說話,我覺得佢今次既語氣好似認真左。
可能係因為面對面?
定佢真係有小小擔心我地既關係?
突然間我諗起阿冰,有小小心虛。
不過我都冇做過咩對唔住Jenny既野,做乜要心虛呢?
「知啦,長氣。你都唔準亂識男仔呀!」我笑笑口咁同返佢講。
「梗係唔會啦。」佢都笑一笑,一手拍落我手臂度。
我錫一錫佢咀唇,黎個goodbye kiss,之後講:「bye bye啦,我開學之後都會多啲搵時間陪你。」
Jenny谷一谷起塊面:「聽住先啦!」
「傻妹~」我摸一摸佢個頭,再目送佢入大堂。
就係咁,開學之前最後一次同Jenny既約會就咁完左。
*
我拎住一袋二袋企左響西鐵站出口等人。
冇錯,我係等緊阿冰。
話說我尋晚同Jenny拍完拖返到屋企之後,又同阿冰sms傾下閒計。傾下傾下,傾到大家都係第二日要入hall,又有好多野拎,咁不如大家約埋一齊行返hall,咁總算有個照應。雖然我同阿冰住唔同hall,但其實都只係隔離果棟,所以大家其實都好順路。
至於我有冇同Jenny講?梗係有啦!我係一個好男朋友黎架嘛!
我同佢講左約左o camp啲朋友一齊返去。
我都唔算講大話啦~阿冰真係我o camp既朋友。
好彩Jenny都冇乜點追問落去,我諗佢都好信我既。
等左一陣,阿冰終到左,佢都係一袋二袋咁。
「喂!等左好耐呀?」遲到既佢用好活潑既語氣咁講。
「冇你上陣o camp果陣等咁耐啦~」我忍唔住寸一寸返佢~
「唓~上次人地真係塞車吖嘛!」佢嘟一嘟咀咁講。
「係啦係啦~今次塞西鐵添呀!」我都係要窒一窒佢。
「係都要講架喎…行啦!」阿冰決定唔再糾纏響呢個問題上面。
「行啦咁。」
阿冰其中一袋行李好似幾重,於是順手抽起佢幫一幫阿冰手。
「哎呀呀~自己拎得啦。」阿冰笑笑口咁講:「我好少要人幫我拎袋。」
「比我展現下啲Gentleman風度啦。」其實我拎多個袋都游刃有餘。
「咁唔該晒你啦!」阿冰向住我黎個90度躹躬。
我拍下佢個頭:「痴線!」
阿冰眨眨眼咁向我伸一伸脷。
之後我地就起程。雖然我地之前淨係傾SMS冇傾過電話,但一路行一路大家都有傾唔盡既話題咁。
「係喎,你男朋友好少同你拎袋架咩?」我醒起阿冰啱啱提起過佢好少要人幫佢拎袋。我估係指佢男朋友喇。
阿冰聳一聳肩,不置可否。
「話時話,唔叫佢今日黎幫你手搬野既?」我追問。
「um…佢都唔想幫我做呢啲操重野。」阿冰好似特登用平淡既語氣講。「況且佢又住得遠,邊會想山長水遠走入黎幫我吖。」
唔。如果係Jenny要我山長水遠咁去幫佢搬野入hall既話,我估我諗都唔駛諗一定會幫。
我係好男友黎架嘛。
「哎呀,佢應該要有啲紳士風度先得架嘛!」呃,忍唔住講左出黎。其實咁樣批評人地男朋友唔係幾好。
「呃,唔好講佢嘞。咁如果係你女朋友去住得遠既地方入宿,你會唔會幫佢?」阿冰望住我雙眼咁講。
佢對眼好靚。
「會。」我毫不猶豫咁講。
「嗯…做你女朋友真係好。」阿冰擰返轉頭望前面,幽幽地道。
「咁不如我做你男朋友啦。」
…
呢句我當然冇講出黎。痴線咩。
不過,話說回來,感覺上阿冰同佢男朋友既關係好似有啲一般?
平時同佢sms都冇提起過佢男朋友。講起佢男朋友呢個話題啱啱都應該係o camp之後既第一次。
但感覺上阿冰又唔似唔鍾意佢男朋友。
關我鬼事咩?
算,我諗我同阿冰既關係未至於要佢對住我講佢既心事。當然如果佢想講我好樂意會聽。
之後我地一路傾下閒計,一路向住嶺大個campus出發。
(待續)
留言列表