OCAMP故.jpg

 

十四

 

我同阿冰響商場入面亂行,佢好似求其咁搵左間越南野就同我一齊走左入去。

 

哈,我仲諗住阿冰一早plan定食間高級小小既餐廳添。話晒都係報答幫佢擋左隻色狼之吻。

 

算,camp花肯主動請你食飯已經好好。

 

越南餐廳點都好過茶餐廳或者大○樂。

 

唔,就咁諗啦。

 

閒日可能冇乜人等位,一入到間越南餐廳已經有位。

 

我地一坐低,阿冰即刻笑笑口咁同我講:「隨便嗌,唔駛錫住我荷包。」

 

我望一望個餐牌,原來而家已經係下午茶時間,A餐至F餐,每個餐28蚊起。

 

……

 

節儉是美德。阿冰真係一個好女仔…

 

又,唯有咁諗。

 

不過講堅,一餐飯既價值,不再於食乜野,而係同邊個食。

 

又離題了。

 

「搵左咁耐都冇乜收獲添。」我嗌左個生牛肉湯河加凍奶茶,之後對阿冰講。

 

「其實我本身都冇諗住今日會買得到,都係睇下啲價格同埋性能咁,所以冇問題呀~」阿冰答。佢就食香茅豬扒湯河,不過就飲凍檸茶。

 

題外話,條仆街侍應落單果陣雙眼係咁望住阿冰,不過其實我都冇資格話人,因為我都係咁。

 

「不過我都唔係幫左你好多,我其實都唔係好熟電腦。」我好承實咁樣講。

 

「呵呵~唔緊要啦,我都係諗住搵個人陪下我睇,比下意見啫~其實啲sales講啲野我都唔係好明,哈哈。」阿冰答。

 

其實…我都唔係好明。

 

「咁你應該搵肥仔賢,佢個樣似係好擅長電腦。」我腦入面浮現起肥仔賢個宅男樣。

 

「哎呀~咪搞我,同佢又唔熟!」阿冰搖搖頭。其實佢可能係諗起肥仔賢果次re u玩屎而反感。

 

「哈哈,都啱,一陣佢出到黎又好似上次re u咁玩屎點算。」

 

「好核突呀你!」

 

之後我地一路食野一路傾計。

 

「係呢,既然你唔係一定要搵個識電腦既人黎幫你睇機,點解你唔等放假果陣搵你男朋友一齊睇?」我忍唔住又想八下阿冰男朋友啲野。

 

阿冰嘆左口氣,回答:「佢話佢而家好忙唔得閒喎。」

 

「吓,咁快就忙?而家好似啱啱開學咋喎?」我有啲奇怪。

 

「佢響港大讀law讀書好忙,而且遲啲又話要上莊,好多野要準備,又要預備上堂。」阿冰望住佢杯凍檸茶,一路督檸檬一路嘆氣咁講:「佢仲話遲啲會冇乜時間陪我。唉,佢之前已經唔係陪得我好多。」

 

「噢…咁諗啦,佢努力讀書都係為左等時你地有好既生活啫…」我安慰下阿冰。

 

「嗯…」

 

氣氛有啲尷尬,我應該轉移下話題。

 

「係呢,你會唔會上莊呀?」我問。

 

「咩莊?上次Cathy媽講果個?」阿冰反問。

 

「係呀。或者其他莊呢?」

 

「唔…應該唔會啦。雖然我都想睇下上莊係咪真係會好似我男朋友所講咁忙。」阿冰又提到佢男朋友:「我想悠閒啲咁過我既大學生活。」

 

不過如果我係阿冰男朋友,比我二揀一,揀阿冰定揀上莊,我諗都唔駛唔駛諗一定揀阿冰。

 

「你男朋友真係身在福中不知福,有個咁靚既女朋友竟然唔抽多啲時間陪佢~」我話:「話晒你都係我地camp花!」

 

阿冰又古古惑惑咁笑住望住我,話:「威哥仔,你都幾口甜舌滑喎~」

 

「唔係呀,我認真架。我真心咁覺得。」我好認真咁回答。

 

阿冰呆左一呆先,之後又嘆左一口氣,話:「你真係識氹女仔…如果我男朋友都係咁諗就好喇…」

 

講完之後阿冰扁扁咀。

 

佢扁咀個樣令我諗起我既Jenny,佢地扁咀個樣真係令人覺得可憐又可愛。

 

雖然唔想貶低Jenny,但阿冰係靚到另一個級數。

 

「嗯,都係果句啦,佢都係為將來你地有好既生活先至努力讀書,讀law既競爭好大架,你咪當體諒下佢囉!黎,笑返先。」我講完之後有小小大膽咁將雙手拉住阿冰塊拉個笑容出黎,搞到佢個樣好戇鳩。

 

我幫佢男朋友講好說話。講堅我又唔係想媾阿冰,如果咁講可以令佢開心返都好既。

 

我想見到開心活潑既阿冰。

 

「痴線咩你~」阿冰笑左出黎,笑住咁細細力推開我對手。

 

我放開手,對住阿冰講:「嗱,笑返咪幾好~笑返先靚架嘛。」

 

阿冰指住我講:「傻瓜。」

 

之後我地冇再特別提到佢男朋友,大家一路傾計一路食埋個lunch/tea。

 

*

 

食完野之後我同阿冰一齊去宿舍附近既超級市場買左小小日用品,之後就一齊返hall。

 

我身為男士,梗係自告奮勇話要幫阿冰拎埋啲野上去啦。

 

不過都係做下樣啫,我估阿冰可能會好似上次搬入hall咁婉拒我上去。

 

「好呀,咁麻煩你啦~」阿冰用輕快既語氣同我講。

 

咦?

 

今次咁順攤既?

 

「交比我啦!」

 

咁我就梗係冇問題啦。唔知會唔會有超友誼既活動等住我呢?

 

例如阿冰主動邀請我大戰三百個回合…

 

 

有先至奇…

 

要背叛Jenny,我都過唔到自己果關喇…我諗…或者…可能…

 

Jenny先至係我女朋友!

 

我拎住一袋二袋咁跟住阿冰上左樓。而家其實先至五點幾,所以啲看更唔會阻住一般既學生訪客上人地個hall。

 

之前可能唔記得講,我地大學既宿舍其實係男女混宿,不過就分男仔層同女仔層,根據實際收生情況都會有男女同層既情況出現,不過咁既情況long wing同short wing就會係全男仔同全女仔。總之係唔會有男女同房既情況發生的。

 

我跟住阿冰上到佢間房,有小小期待,唔知佢間房係點架呢?佢同房又靚唔靚女呢?

 

(待續)

arrow
arrow

    葉開葉開 發表在 痞客邦 留言(0) 人氣()