十九
某日下午。
「係呢，你係咪同阿冰拍緊拖？」肥仔賢望住我問。
我爭啲將口入面既凍檸茶噴埋出黎，肥仔賢你響邊度聽返黎架？
順帶一提，我今日落堂之後，肥仔賢同埋Amanda邀請我去canteen食個tea，所以我而家坐左響canteen入面，同對面坐緊既肥仔賢同Amanda一齊食個tea，當係小型re u喇。
「痴線，你響邊度聽返黎架？」我急急忙咁反問。
「成日都見到你地出雙入對，好奇問下啫。」肥仔賢用不懷好意既眼光望住我，望到我有啲唔舒服。
「傻架咩! 你地又唔係唔知佢有男朋友，我又有女朋友! 咁又點會響埋一齊呢？」我要快啲澄清返先。
「男未婚，女未嫁…就算結左婚都可以離婚架啫。」肥仔賢點下點下頭。
「得啦得啦，唔係咪唔係囉，唔駛咁大反應既…」Amanda眯埋對眼對住我講。
乜我好大反應咩？
「咁…影響我唔緊要呀，費事影響到阿冰啦。我地係朋友咋! 朋友!」我唯有咁答。
一陣傳到去佢男朋友度咁點算呢？雖然我唔認為響嶺大發生既野會傳到去港大。
「嘿嘿，仲以為你媾到camp花咁犀利添。」肥仔緊仲係keep住果個不懷好意既笑容。
「痴線，唔講呢啲啦！」
「好啦好啦。」肥仔賢突然坐直個身，換左個正經既表情問我：「威哥，有冇諗住上莊？」
其實我都聽聞過肥仔賢想上系莊，仲諗住做主席，所以我都估到佢今日呢個tea會問下我有冇興趣上莊架喇。
點講呢？我本身對上莊持開放態度，燃燒青春（GPA）嘛。不過我而家已經成日都見唔到Jenny，而上莊應該會忙到星期六同日都返唔到屋企，加上我兩位好友又好似冇乜興趣咁…唔，都係唔上喇。
況且連僅餘既小小時間都唔見Jenny，陣間佢響港大比啲狗公媾左點算？到時唔係燃燒青春（同GPA），係燃燒自己既戀情喇。
一諗到呢度，我都係答佢：「Sorry呀，我都好忙，所以應該唔加入你地啦。」
Amanda話：「忙到成日同阿冰兩個人行街？」
喂，唔好再提得唔得？
「我指星期六同日嘛，又要練波又要返屋企，遲啲仲要比賽。」
「咁我地都唔會個個星期六日都留響學校既。你再考慮下啦。」肥仔賢繼續游說我。
「唔啦。」我斬釘截鐵咁拒絕。
「唔，咁好啦。」肥仔賢無奈咁放棄。
之後成餐tea都有啲尷尬。
「如果你改變主意就同我講啦。」肥仔賢走之前同我講。
「咁啦，如果你地有活動要幫手既出聲，我幫到一定幫。不過要去到上莊咁困身，我承諾唔到咁多，sorry。」我同肥仔賢講。
「哈，唔駛say sorry既，人各有志嘛，再搵我啦。」
呢一刻我覺得肥仔賢好似突然有陣大將之風，同之前玩食屎果個好似唔同左人咁。
雖然佢個look仲係好L毒。
之後，我揮手向佢地道別。
*
每年大專盃之前，我間大學都會舉辦一個叫淫龍盃既邀請賽，會邀請其他七大院校既校隊黎參加唔同既球類比賽。
足球當然係其中一個比賽項目啦。
轉下眼就已經到左比賽之前果一日，我地既對手係大專盃既爭標大熱門理大。第一圈就遇到咁強既對手，應該出硬局。
算啦，就當見識一下我地既水平究竟差幾遠都好。
陳sir響比賽前一日加多一課操練，不過都係輕鬆既操練為主，而且都冇公佈都聽日既正選。
不過球隊入面已經有兩位比我更強既中堅，一個係隊長阿東，同我一樣係高大型既中堅，但我覺得佢搶點頂頭鎚勁過我。而另一個係叫森遜既矮仔，人係矮左啲但就好靈活，而且體能極佳，攔截能力又強。因為咁，加埋比賽之前既分隊賽既陣容（大概係正選隊對後備隊咁上下），我相信自己都未必係正選了。
我要加把勁改善自己既球技先得。
順帶一提，兩個中堅都係year 3既老鬼。
果日練完波之後同班隊友食埋飯，跟住我同阿熙就返hall了。
*
「你聽日會唔會黎睇我比賽呀？」我響電話度問Jenny。
雖然我估自己多數都係後備，不過都想自己女朋友黎捧一捧場既。
「唔…我星期一有科mid term呀…」Jenny把聲好似有啲為難咁。我明既，Jenny係一個好重視自己成績既人，即使入左大學都想好好讀書，想1st hon畢業，所以佢想專心溫書都好正常。之前考公開試拍拖果陣既節目好多時都係一齊去自修室溫書。
「嗯…唔緊要啦，讀書緊要，反正我聽日應該都係後備居多。」話雖如此，我語氣中難免有小小失望。
「唔…不如我聽日都係黎睇你比賽喇。」
「傻妹，讀書緊要呀，我知你好緊張自己既成績。今次撞左mid term冇計啦，下次大專盃正式比賽既時候你黎睇咪得囉，到時唔會再撞mid term喇呱。」
「但係…」
「唔好但係喇，你一來一回加埋睇比賽既時間就冇左成日架喇。我都想做個體貼既男朋友，唔想你咁辛苦騰黎騰去架嘛。我一比完賽就返出黎搵你，去你屋企附近食個quick dinner，再去陪你溫書，好唔好？」如果Jenny真係過黎既話佢成日都唔駛溫書架喇，我唔可以咁自私架嘛。
況且，佢黎到之後我坐足90分鐘咪仲戇鳩。
「咁好啦。」Jenny把聲好似開心返啲。
傻妹，真係易滿足。
「咁我訓先啦…雖然我應該唔係正選，但都要抖足精神!」我道別。
「嗯，我都要溫書喇…」Jenny繼續話:「雖然我都仲想傾多陣…」
唔好喇呱…我想抖下。
「聽日見面再傾啦，你都加油，bye bye。」快快手cut線先。
「好啦。bye bye。」
之後覆埋阿冰個訊息先。我有同佢講我聽日比賽，不過本身諗住叫Jenny黎睇費時佢地碰面，加上難得星期六費事阻人拍拖，所以都冇邀請阿冰黎睇波。
我講過，我係唔會跨過果條界線，作為好朋友，我都希望阿冰同佢男朋友好好咁享受呢個星期六同日。
至於真心話呢？
屌，唔知呀。
「傾完嗱？」阿熙坐左響自己張床度問:「終於唔駛聽你地打情罵俏嘞。」
今日阿熙冇出去補習，似乎都係為左聽日做好準備。佢同我唔同，佢100%會係正選。我敢用人頭擔保。
「係啦係啦，唔阻住你休息啦熙哥。聽日入多幾粒啦。」我攤低落自己張床。
「你都好好休息啦，時刻保持最好既狀態，咁先至係好既運動員。」一講起足球阿熙會變到好認真。
「知啦，早抖啦咁。」
好期待聽日，又好緊張。
（待續）
留言列表
{{ article.title }}
