二十
今日又係一個風和日麗既好日子，秋意剛起，呢啲溫度踢波最適合。
我地場初賽踢第3場，成1點鐘先開波，可以同一班隊友食個brunch先去球場集合。
我地大部分隊友都有出席呢個brunch。
我估我雖然冇份出場比賽，但可能因為始終都希望自己就算後備出場都好，可以有機會落場，所以其實內心都有一絲緊張，成餐飯冇乜點出聲。
隊長阿東突然走過黎拍一拍我膊頭:「阿威，平時練波你都多野講架喎! 做乜咁靜呀？」頓了一頓，又道:「唔駛緊張架，一陣如果有得出場比賽，記住放鬆自己。對手勁我地咁多，壓力唔應該響我地呢面。」
隊長真係隊長，咁都估到我緊張。
「知道。」我聽完之後放鬆左小小。
*
我地早左一個鐘去到球場集合。陳sir宣佈正選陣容果陣，個排陣一如我所料，隊長東同森遜係正選中堅，我只係後備。
阿熙？正選前鋒啦梗係。
我有小小鬆一口氣之餘，又有小小唔甘心。
之後成隊一齊開始熱身…
響我好專心咁熱緊身既時候，突然間有隻手拍一拍我膊頭。
屌，嚇死人咩？
拍我既係我地既正選防守中場司徒俊熹，我地通常就咁叫佢司徒，同我住埋同一幢hall仲要係同層。
「屌，嚇死人咩？」我將啱啱心入面果句爆左出黎。
司徒指一指通去觀眾席果條跑道，話:「有條毒撚拖住你條女過緊黎喎。」
我呆左一呆，我條女？Jenny佢又話唔黎既…仲有毒撚…？
我望一望司徒指果個方向，見到肥仔賢同阿冰，Amanda同Cathy四個人行緊去觀眾席。
「屌，邊度有人拖住我條女呀？」就算係講緊肥仔賢，佢都係同3個女仔行緊啫。
「阿冰吖嘛，今年freshmen入面最靚果個，佢咁撚正，驚你帶綠帽所以嚇下你啫~」司徒哈哈一笑。
「屌，佢唔係我條女呀。」
「係啦係啦，你話唔係就唔係啦，地下情呢啲野我明既。」司徒又笑一笑。
「屌，費事理你!」我專心熱身算數。（雖然我唔係正選…）
不過，雖然我有同阿冰講過我今日有比賽，但又冇叫過佢黎睇，咁點解佢會黎既…?
莫非，佢係黎睇第二個?
一諗到呢度，我個心好似有小小唔舒服…
*
趁住開波之前去廁所屙個靚尿先。
屙完出返廁所響條跑道行返後備席時，我個腦仲係諗緊阿冰。
佢係黎睇第二個？定想比個驚喜我，話係黎睇我？
唔…
話時話，佢唔係應該尋日已經返左屋企，準備今日同男朋友拍拖既咩？
行行下，差唔多經過觀眾席…
唔…不如上去打個招呼？
反正我只係後備，行開一陣應該唔覺眼既…
好啦。
就咁決定。
於是我行行下突然轉個彎，行上觀眾席。
「Hi。」我向住肥仔賢佢地4個打招呼。
「你快啲返落去熱身啦，上黎做乜？」肥仔賢笑下我。
「我後備咋，咪上黎同你地say個hi囉。阿熙就正選。」
聽到阿熙係正選之後我發覺Cathy對眼即刻雙眼發光。
哦，原來Cathy係黎睇阿熙。
乜個小朋友咁有吸引力咩？
不過佢係一個靚仔既小朋友。
「咁得閒過黎睇波既？」我問佢地。
其實我係想問阿冰。
「冇呀，我同Amanda搞緊上莊啲野，知你地有比賽，咪黎睇下波當透下氣咁囉。」肥仔賢咁講。
「我兩個仔仔比賽喎，梗係要黎捧下場啦。」哈，Cathy媽媽你講大話，你都唔係黎捧我場既! 你係黎捧阿熙場咋呱？
「我陪阿媽黎睇架!」阿冰對住我笑左一笑，指住我：「你又唔叫我黎睇。」
「咁我諗住橫掂自己都係後備，唔通黎睇我坐咩？哈哈。」我求其搵左個原因，續道：「我返落去先啦，轉頭同阿熙都講聲你地黎左喇。」
「加油啦。」佢地4個為我地打氣。
即使唔係特登黎睇我，但我至少知道左阿冰唔係黎睇第二個，心入面舒左啖氣。
我轉身返落球場。
*
呢場初賽好快就開始左。我地作為一隊魚腩，對住大專盃既熱門理大，當然係由一開波就處於捱打既局面。
陳sir講過今日既戰術係先求穩守，再以阿熙為重心打反擊。所以排左個4-5-1陣容，中場既人選都係偏向防守，再配以速度快既兩隻翼鋒支援單箭頭既前鋒阿熙。
陳sir真係好信得過阿熙。
不過都難怪既，響呢個幾月練波既時候，真係睇得出阿熙啲波底好好，講技術同意識都係全隊入面最強果個。
踢過港青真係唔同啲。
但係現實既情況係，雖然我地有呢位前港青在陣，但係都改變唔到我完全捱打既情況，唔夠20分鐘已經比人入左一球。
如果唔係守門員Steven力挽狂瀾，應該唔止輸緊一球。
我地只有零星攻勢。
然後去30分鐘左右，又比人響右路傳中，佢地個前鋒再力壓隊長阿東再頂入一球。
0比2。
真係話都冇咁快就輸緊兩粒。
阿東幾分鐘之後響一次同對面前鋒爭頂既時候，落地果下似乎落得唔好，隻右腳一拗，成個人跌左響草地上面，個樣極度痛苦。
陳sir見狀即刻對住我講:「威仔，即刻熱身。」之後衝出球場睇下阿東既情況。
嘩，唔係下嘛，啱啱仲睇緊出面飛砂劈石打仗咁款咁，而家竟然響呢個情況之下有機會出場？
仆街，好緊張。
唔理了，熱身先。
（待續）
留言列表
{{ article.title }}
