OCAMP故.jpg

 

二十一

 

「喂,阿東唔掂呀!」我一邊熱身,一邊聽到後備席果面附近嗌出黎。

 

冇錯,阿東響後備席附近接受緊治療。

 

陳sir向住我個方向做左個手勢,叫我返過去後備席。

 

嘩,好緊張。我一路跑返過去既時候feel到自己對腳都震埋。

 

我真係冇諗過會響呢種情況之下出場。

 

呼。

 

深呼吸放鬆先。我又唔係第一次踢正式比賽,學界都踢唔少啦,駛乜咁緊張?

 

我回過神黎既時候,已經返到後備席。

 

「威仔,準備好未?放鬆啲踢就ok。」陳sir拍一拍我膊頭咁講。

 

「…係!…係!」我其實唔知自己答緊乜。

 

就係咁,唔計友誼賽,我響嶺大足球隊既處子戰就係響淫龍盃後備入替受傷既隊長阿東拍住森遜打中堅。

 

我行入球場去到自己中堅既企位,另一位中堅拍檔森遜同我擊一擊掌,同我講:「加油。」

 

比賽繼續展開。

 

老實講,我都唔知自己踢緊乜,淨係好似當個波係炸彈咁埋到黎就係咁踢走。

 

不過暫時都叫捱到冇失波。

 

直至臨完半場既時候…

 

我又係好求其咁出盡奶力一腳踢走個波,個波飛過半場,阿熙搶到個靚位然後好靚咁痴左個波落黎。之後轉身,一下子過左個後衛,再推過埋另一個中堅,自己殺入禁區,再好冷靜咁射個地波,個波穿過守門員手邊入網。

 

咦?

 

入左?

 

堅唔堅?

 

睇住阿熙張開雙臂咁慶祝,我應該唔係眼花?

 

真係入左呀!

 

仲要係我助攻!

 

呢一球將我既緊張咁一掃而空,將我帶返去平時既水準。

 

半場既時候,阿熙走埋黎同我講左句:「你果下亂鳩咁踢都比到我,好撚野喎。」

 

我回返佢一句:「屌你啦,我瞄住你黎傳架!」

 

「哈哈,你話係就係啦。」

 

*

 

不過,所謂回復返正常水準,響理大既球員面前仍然完全不值一提。

 

或者係因為上半場尾段先入替,啱啱開始既時候仲感受唔到對面係幾咁勁,但當下半場認真咁踢既時候先發覺其實雙方差距好大。

 

尤其是我地既體能遠遠不及對手既時候。

 

另外,我自問身材都算高大,但係搶高空波既時候真係唔夠對手既前鋒黎,明明佢矮過我,但係搶點既時間、位置都好好,最後我比佢響我面前頂入左一球。

 

下半場30分鐘,我地已經落後到3比1。

 

阿熙響入左果球之後,受到對手嚴密看管。對手畢竟係理大,啲防守球員都好勁,就算係阿熙都唔容易再次搵到機會攻門。

 

我地得一個前港青,對面分分鐘有唔止有幾個現役港青同甲組球員。

 

然後因為隊友們既體力都下降既關係,所以最後又比對手攻入多一球。

 

最後我地輸4比1完場。

 

哨聲響起時候,大家都頭dup dup。雖然一早知道雙方實力上既差距,但係真係大敗一場既時候,個心一定係好難受既。

 

「踢得唔錯了。」陳sir對住垂頭喪氣既大家,鼓勵我地咁講:「人地有精英運動員計劃,唔少係踢緊甲組既,所以我地可以同佢地踢成咁,算唔錯架喇。」

 

順帶一提,果陣香港既頂級足球聯賽仲係甲組,香港超級聯賽係過兩三年之後既產物。

 

「係呀,大家已經踢得好好。」受左傷既阿東都同大家說道。

 

「隊長你點呀?」我問。

 

阿東苦笑左一下,不置可否。

 

之後陳sir同大家檢討左一陣。

 

*

 

賽後檢討完畢之後,大家都準備離開。

 

「其實你唔係真係咁差,始終人地既水平比我地高,當然下次爭頂既時候你可以試下…」阿熙響我垂頭喪氣既時候通常唔會再奚落我,而今次更加比左啲鼓勵我。

 

唉,我在場既時候失左兩球,仲要有球係響我面前頂入,失望一定有啦。

 

轉換下心情諗下第二樣野先。

 

呀,係喎,肥仔賢佢地黎睇我地比賽,而家完左場應該要向佢地打個招呼先!

 

雖然話係我間大學主辦既邀請賽,但其實唔計student helpers既話,黎睇波既同學根本就寥寥可數。

 

我望一望向觀眾席,發覺肥仔賢同Amanda已經走左,得返Cathy同埋阿冰坐響度。

 

「喂,Cathy媽媽佢地黎左睇我地比賽,我地上去打個招呼?」我打斷左阿熙說話,向佢提議。

 

「好呀。」

 

於是,我同阿熙走上觀眾席。

 

「阿仔,你好勁呀!」Cathy一見到阿熙就同佢講。

 

「唔啦,我地被技術性擊到。」阿熙回答。

 

「係呢?阿賢佢地呢?」我問。

 

「佢地完左場就走左喇,話要返去搞上莊啲野。」Cathy答。

 

「唉,乜上莊真係會咁忙咩…」阿冰嘆左口氣。

 

阿冰好似唔係幾開心咁喎。咩事呢?

 

Cathy響呢個時候問我地:「你地去唔去食野?我請你地啦!都辛苦兩位仔仔比賽啦。」

 

一聽到有人請客,到阿熙雙眼發晒光咁,佢答:「好呀,等我沖埋個涼先! 好快!」

 

其實我都想去食個tea,不過我應承左Jenny比完賽就返去陪佢。

 

「我有啲野做唔去啦。」我無奈咁講。

 

「咁我都唔去。」阿冰對住我眨眨眼之後講。

 

噢,我唔去你又唔去?

 

諗多左喇,佢應該都係因為要趕住返去陪男朋友。

 

「哈,唔理你地啦,我拿拿淋去沖涼先。」阿熙之後再轉過頭同Cathy講:「陣間見。」

 

Cathy對住我同阿冰講:「唔緊要啦,我地下次再食。」之後轉向阿熙笑住講:「嗯,一陣閘口等。」

 

之後我同阿熙就一齊去更衣室。

 

(待續)

arrow
arrow

    葉開葉開 發表在 痞客邦 留言(0) 人氣()