十二
辦完小小手續之後,由於我同阿冰住既hall相鄰,所以我同佢向住我地既hall既方向行緊,但因為始終我同佢唔同hall既關係,我淨係送到佢去佢既hall樓下。
「唔駛幫你搬埋上去?」我問佢。
「唔駛啦~廢事比人誤會你係我男朋友啦!」阿冰又對住我伸一伸脷。
嗚呀,比阿冰響心口打左一鎚了,稍微收到打擊了。
不過其實都冇乜野,都話左我冇諗過要媾阿冰,淨係想識多個靚女朋友。
「好啦,拜拜~」阿冰用輕快既語氣同我道別,之後轉身走入。
「拜拜~」我都向阿冰揮手道別。
望住阿冰走入既背影,唔知下次幾時可以再好似今日咁兩個人單獨相處呢?
我轉身離開,向自己住既hall進發。
我住既hall其實只響阿冰住既hall隔離,所以都唔駛兩分鐘,我已經行到過去。
唔知我同房係個咩人呢?係同我一樣既freshman定係老鬼呢?難唔難相處呢?唔會係獸父Simon呱…應該唔會既,佢講過自己係住另一棟hall,除非佢轉hall啫。
呃,而家先開始有小小緊張。
我行到去自己間房既門口,隱約聽到入面有啲執野既聲,似乎我同房已經早過我到左。
雖然係自己間房,不過既然有人響入面,我都係敲下門先。
咯!咯!
「入。」同房由入面向我講。
咦?把聲咁熟既?莫非…
我擰一擰門把手,冇鎖。
一開門,見到個好似讀初中既仔響度執緊野,見我開門,就抬起頭望一望我。
冇錯,呢條友唔係乜鬼野初中生,而係阿熙。
「估唔到咁有緣喎~」我笑住咁同阿熙打招呼。
「孽緣呀…」阿熙擰一擰頭。
「屌你啦。」我對住佢舉中指,之後問:「你都係住呢間hall既?唔早啲話我知,等我早啲知你係我同房嘛!」
「彼此彼此啦~你夠冇同我講咯!」阿熙回答。
諗落有啲慚愧,我re u之後日日掛住同阿冰傾計,都冇搵過o camp入面另一個好友阿熙添。
「咁你呢排忙咩呀?」我問佢,打聽下佢近況。
「冇啦,都係返工放工,間中拍下拖咁囉。」阿熙答。
「你有冇報hall camp?」我再問。
「有呀,雖然玩過系camp,不過都想試下玩hall camp識多啲人嘛。入左大學都唔想做摺友。」阿熙回答。
「咦,我地同房,咁唔知會唔會係同組呢?」我諗我地係同房,同一組既機會應該都幾大~
「拎本野出黎望望咪知囉。」阿熙講完就拎左本hall book出黎。
屌。
同房但唔同組既。
「哎…唔係同你一組添。」我歎息。
「你好失望咁喎基佬。」阿熙望住我陰陰咀笑。你而家個樣先似基佬呀。
阿熙再陰陰咀笑:「仲回味緊上同Simon打茄輪?」
「笑乜尻,我果次幫阿冰咋嘛。」我抗議。
我地就咁傾左陣計。
*
hall camp話咁快就完左。
唔知點解硬係覺得冇系個o camp咁好玩。
係因為成個camp既流程冇咁chur?定因為同組既人冇咁夾?定還是因為住hall所以冇咁有宿營feel?
真係唔知。
*
好快就開學了,組媽Cathy約我地成組人響中菜廳飲茶兼食所謂既開sem飯。
嗯,其實只係搵個藉口大家出黎re u吧。
我上完堂lecture就自己搵埋阿熙同阿冰一齊上中菜廳。雖然大家都係year 1,但係其實唔係個個都會響第一個Sem揀呢科讀。一齊上呢科既除左我地3個之外,仲有走左堂既肥仔賢。呢條友真係…第一堂lecture就走左堂。
我地3個去到,其實大致上已經齊晒人。肥仔賢都響度。佢雖然走左堂,但係出席re u倒是幾準時…
咦,唔見獸父Simon既?
「咦?獸…Simon爸爸未到?」我一坐低忍唔住問。
「佢話有堂上所以唔黎啦。」Cathy回答。
咁奇怪?定係因為上次re u既經歷令佢不快呢?
屌,我都好不安啦。
「食野先啦,唔好等啦。」冇乜存在感既奶爸Alan同我地講。
因為我地遲左小小,佢地已經開左餐,大家基本上係食住等我地。
成餐飯大家都係閒話家常。
傾傾下,Cathy突然問我地:「係喎,你地有冇諗住上莊?」
上莊?好似聽過係上大學燃燒青春必做既事情之一。不過又據聞上莊都有大細之分,有啲莊例如學生會好chur,而有啲乜乜興趣學會就好hea。
「有呀!」肥仔賢雙眼發光。
Cathy又問:「咁你會唔會想上系莊?」
「我想上啲唔hea既莊,系莊啱唔啱?」肥仔賢反問。
「系莊一定唔會hea,雖然唔夠學生會辛苦,但都好chur架。」Cathy答。
「阿媽你唔係莊員,不過好似都知得幾清楚下喎。」Amanda提問。
「哦,我同房係吖嘛,佢地而家準備招莊,所以都托我問下你地入面有冇人有興趣。」Cathy媽答。
「咁預我一份先啦!」肥仔賢雙眼仲係發緊光:「你地呢?有冇人一齊上?」
嗯,上唔上好呢?
我入大學之前都有打算參加下啲活動,燃燒下青春(GPA)。其中我好鍾意踢波,咁一定會去試下選校隊架啦。至於上莊…都諗過下既。不過好多人都話上莊真係燃燒GPA,我雖然未至於好似Jenny咁係讀書狂人,但都唔想個GPA太差。
如果阿冰同阿熙都上既話我都會諗下既。叫我同肥仔賢一齊上莊,一陣佢又逼啲莊員食屎咁點算。
就係咁,呢餐開sem飯就響討論上莊既話題下完左。
(待續)
留言列表