OCAMP故.jpg

 

二十四

 

「係呢,做乜Cathy媽媽無端端會想黎睇我地比賽既?」我要轉移話題先,暫時唔好再搞到阿冰唔開心。

 

同靚女食tea既時候梗係希望對住個開開心心既靚女架嘛,更何況眼前呢個女仔響我心入面佔有一個位置添。

 

唉,唔好再諗啦。現實係我點都唔會同到阿冰一齊。

 

我亦都唔會主動去同佢響埋一齊。

 

當然,唔理我係咪鍾意阿冰都好,我都希望可以真真正正咁幫佢解決到佢既難題。

 

不過而家唔係時候。

 

佢肯主動同我傾訴既時就會講架啦。

 

阿冰又露出佢果個古惑既笑容,說道:「唔知呢,佢話想睇下佢兩個組仔比賽喎~」頓了一頓,又話:「定係可能佢想睇阿熙比賽呢,kekekee…」

 

唔記得同大家講,阿冰同Cathy住埋同一棟hall,所以佢地會傾下心事都唔奇。阿冰咁講法,唔通Cathy真係對阿熙有意思?

 

「你咁講法…莫非Cathy媽媽鍾意阿熙?」但係阿熙有女朋友架喎。

 

阿冰聳一聳肩,答:「唔知呢?」諗左一諗,又問:「其實阿熙同佢女朋友感情好唔好?」

 

「唔…」我諗下先…

 

阿冰咪一咪埋隻眼,用一隻手指指住我話:「唔好扮野,你係佢同房實知既。」

 

唔…雖然我同佢同房,但話題都係圍繞埋啲戇鳩野、足球,同埋互相寸下大家,愛情既野真係好少傾起。

 

不過話說回來,好似得我同Jenny會響房入面傾電話,我又唔係好覺阿熙有同佢女朋友傾電話…

 

呢層,或者係阿熙或者佢女朋友唔鍾意傾電話?唔係個個都好似Jenny咁既。

 

阿冰見我唔出聲,搖一搖我隻手,問:「即係點啫~」

 

我諗左一諗,都係搖一搖頭:「我地好少傾呢啲野。」我如實回答。

 

「唓~」

 

「不過既然阿熙有女朋友,Cathy媽媽應該都唔好做得咁過份?」正所謂寧教人打仔,莫教人分妻~

 

「你唔好亂講野呀,Cathy媽媽想同個組仔friend啲咋~」阿冰打左我右手前臂一下。

 

唔…男同女有冇純粹既友情?

 

唔知呢?

 

至少,我望住我眼前呢個女神級既女仔,我個心話比我聽,我係鍾意佢既。

 

就算有時響hall百無聊賴,我至少有一半既時間掛住既、佔滿晒我個腦既,都係佢。

 

就算同Jenny傾緊電話,我有時都係會掛住佢。

 

我個心入面,已經唔止住左唔止一個人,係兩個人。

 

無可否認我仲好愛Jenny,但同時亦都比阿冰慢慢進駐左我既心。

 

都係果句,只要自己控制到,唔好跨越朋友呢條界線就得了。

 

咁對我同阿冰都係好既。

 

 

屌,人地阿冰有話鍾意你咩?

 

「喂…」

 

 

「喂!」阿冰既聲音將我從沉思中拉返現實。「做乜呆晒咁既?」

 

「呃…Sorry,啱啱諗緊小小野…」我啱啱唔小心諗野諗到出晒神添…

 

「諗緊乜野諗得咁專心呀?我講野你都好似聽唔到咁…」阿冰問。

 

哎呀,啱啱諗果啲野唔講得比阿冰知架…快啲求其搵個藉口先…

 

「唔…我仲係諗緊頭先場比賽…」一講起場比賽,我又即刻覺得自己響足球方面真係技術不足…嘆左一口氣,又道:「唉…輸得好慘。」

 

「唔會啦!你唔係話人地好勁既咩,盡晒力去比賽就得架啦!」阿冰冇深究我係咪真係諗緊場比賽。順帶一提,我之前同阿冰sms既時候,都有向佢提及過理大既實力,所以佢都知理大係一支冠軍級既隊伍。

 

「我踢得好差…輸得好肉酸…」我又嘆口氣。

 

「都話唔會咯…你啱啱出盡全力咁去阻止對面既進攻,就算我唔識睇足球我都知道你係博晒命咁去踢呢場比賽。」阿冰響佢對面個位度企一企起身,摸一摸我個頭,用好認真既語氣講:「你好有型。」

 

我?

 

有型?

 

我feel到塊面有小小熱,笑一笑咁望住阿冰講:「係咩…多謝。」

 

「呵呵。」

 

之後我地就一路食tea一路傾下其他閒計。

 

我亦都冇再趁機問阿冰男朋友啲野,費事佢唔開心啦。

 

埋單既時候我諗住請阿冰食飯展現一下紳士風度,諗住請佢食,點知佢話:「同平時一樣AA啦,冇乜特別野唔駛請我喎。」

 

我答:「見你唔開心先請你,食完個tea要開心返啲呀!ok?」

 

「好啦好啦,你咁有誠意,我就比你請我啦~」阿冰笑返一笑。

 

希望你呢個笑容唔係扮出黎,而係真正既笑容喇。

 

之後我地都離開餐廳,而我走之前都去左班隊友果面道別。

 

我地食完佢地都未走,成班人仲吹緊水。

 

其實一個團隊一齊食野係開心既,下次一定要join。

 

「喂,兄弟們,我食完行先喇。」我過去同隊友們講。

 

「今晚返hall?」司徒問。

 

「返去陪女朋友呀。」我回答。

 

「記得做足安全措施呀!」

 

「屌你。」

 

*

 

之後我同阿冰一齊搭西鐵走,佢返hall,我就返屋企。

 

「今晚留響hall?」我問。

 

「唔…」阿冰諗左一諗:「都係返屋企。留響hall又冇人陪,同埋都要分啲時間陪下屋企人既。」

 

「阿賢佢地呢?」

 

「唔知呀,可能響campus搞上莊啲野,又可能返左屋企…」

 

講左等於冇講…

 

冇幾耐之後,阿冰差唔多到站。

 

「阿冰。」我響阿冰走之前叫一叫佢。

 

「係?」

 

「如果有唔開心,記住要講出黎呀。」至少比我幫你分擔下…

 

「知道喇,傻瓜。」阿冰督一督我額頭:「我落車啦,今晚再搵你喇。」

 

「拜拜。」你係開心既,我做傻瓜又有乜所謂?

 

(待續)

arrow
arrow

    葉開葉開 發表在 痞客邦 留言(0) 人氣()