十七
踢完所有比賽之後，我地所有人被集合埋一齊，我諗係要宣佈入選名單。
集合之後陳sir開始演講，但佢講既野其實我冇乜心機聽。
我低頭望住個地下，仲係好灰。諗起啱啱自己既表現，有邊度可以再做好啲，點樣可以防守到阿熙等等。
唔係，以我而家既技術根本冇可能防守到阿熙。
諗下諗下…
「…羅柏全，梁建威，余正熙…」
嗯，啱啱好似有把中坑聲叫緊我個名…
嗯…
嗯…
咦？
我個名？
「啱啱係咪有人叫我個名？」我抬起頭，問一問身邊既阿熙。
阿熙望一望我，又係擺出果副冇你咁好氣既樣，同我講:「好心教練講野你就專心啲聽啦。你之後練波果陣乜都唔聽踢到pat屎咁唔關我事。」
練波？乜我入選左咩？
阿熙望住我呆呆地，一臉疑惑咁既樣，於是同我講話:「睇黎你真係乜春都冇聽到，叫左你個名，你入選左呀。」
「哦？」我仲係有啲難以置信。
「又哦乜撚呀！」阿熙問:「不過我都好柒開心可以同你做隊友。」之後佢笑左一笑，伸左隻手出黎。
我下意識咁握返佢。
*
足球隊練波既時間係星期六朝早同星期日下晝。
哎呀，咁樣咪會少左時間同Jenny拍拖？
要諗下點樣解釋之餘，Jenny又唔會失望了。
唉，船到橋頭自然直。
臨走之前，我忍唔住行過去陳sir面前問:「教練，我覺得自己踢得唔算太好，尤其是第二場其實唔係表現得好好，點解…我仲可以入選？」
陳sir望實我，之後笑住咁答:「你係梁建威呀呵？不如我叫你威仔啦。你表現其實唔錯，尤其是高空波方面，所以唔好咁冇自信。至於你所講既第二場，其實我冇期待過你地呢度任何一個人可以mark得住余正熙。」
嘩，乜原來阿熙咁猛料，我今次真係有眼不識泰山。
「不過，你當然仲有好多進步空間，呢料野慢慢改進下啦，來日方長。」陳sir話:「況且我地呢度唔係話要爭標，唔好比咁大壓力自己，慢慢提升實力吧。」
「嗯，我知架喇。」
「咁聽日練波記得準時到。」陳sir向我叮囑。
「好，拜拜教練。」我向教練道別，之後走去搵埋阿熙，慢慢離開球場返hall。
之後我同阿熙一齊行返hall。
其實我既感覺係好彩多過興奮，不過點都好，至少我叫入選左校隊。
「估唔到你咁勁。」我真心讚阿熙。
「唔勁喇。」阿熙應得好簡短，而且冇左果種寸寸貢既感覺，唔係好似佢。
「我之前真係大言不慚，哈哈。」
「…」
「喂，做咩唔出聲？」阿熙踢得咁好，又成功入選左，應該好開心先啱架，點解會唔出聲既？
「…Sorry。」
咦？
「我見你啱啱比完賽之後好撚頹。其實我應該一早同你講我以前入過港青同踢過流○青年軍。」阿熙續講:「咁你唔會好似啱啱咁嚇一跳，表現應該可以再好啲。其實我估你都會入到選，但萬一你真係落選既話，幾驚你會嬲鳩我。」
哈，原來佢以為我介意呢樣野~唔怪知得佢比完賽之後冇寸我，仲拍我膊頭安慰我啦。佢真係好鬼死cute。
咁既感覺先至match返佢個小朋友樣架嘛。
一世人兩兄弟，點會為左咁小事嬲呀，阿熙真係諗多左。不過咁即係證明其實佢都好重視同我呢段友情，係幾開心既（非基）。
話說回來，原來佢有咁既履歷，唔怪得知咁勁啦。
「哈，講呢啲。你啱啱出盡全力先至叫做對對手既尊重吖嘛！」我笑笑口咁搭住佢膊頭：「咁你之前唔同我講既？」
「屌，你都冇問，又寸寸貢咁款。」阿熙笑左笑，之後甩開我搭住佢膊頭隻，講:「得啦死基佬。幾驚你會嬲鳩我。」
「我似啲咁小器既人？」
「似。」
呵，咁快回復返平時咁。
*
我返hall放低左啲野，沖埋個涼抖左陣就返屋企。
夜晚，我就約左Jenny出街拍拖~係住左hall之後第一次同佢出街。
雖然都成個幾兩個星期冇見面，不過冇情趣既我都係諗住同佢求其響銅鑼灣行下，之後是旦搵間餐廳食下野。
我去左Jenny屋企樓下接佢，而佢都好準時出現。
同阿冰簡直完全相反既對比。
「我地行咯~」Jenny一見到我就橋住我隻手臂，將個頭挨落我度。
「做咩咁嗲呀？」
「好耐冇見喇嘛！人地好掛住你呀～」Jenny撟得再實啲~
咁又係，我地就算考緊會考同高考果陣都成日一齊出黎溫書，都未試過成兩個星期冇真係出到黎見面。
之後正如我平時既計劃一樣，我同Jenny根本就係冇計劃地亂行。
兩個人一齊開心咪得囉。
行到咁上下我地去左間譚○度食米線。
今日我既話題都係環繞今朝我踢波選拔既事，主要係我講，Jenny就靜靜咁聽。
「都話我老公勁架啦！」Jenny聽聽下都會回應下我。
「我唔勁啦，我同房先犀利，原來佢以前係港青黎架。」
係喎，Jenny仲未知我練波既時間係星期六同日。
其實我都冇預係練呢啲時間。
練波練星期六同日既意思就係我地星期六同日會少見左，即係我地既見面時間又會少左。
但點都要同佢講架啦。
「係呢老婆…」我諗緊點開口好。
「老公？」
「即係呢…我入選左足球隊，即係我會用左啲時間黎練波…」我都係照直講。
Jenny冇出聲，繼續望住我等我講落去。
「咁呢，練波既時間就係星期六朝早10點同埋星期日下午3點…即係我星期六由hall返出黎之後星期日朝早又會入返去…」我繼續講（都要預鬆啲時間返去學校，因為車程都要超過個半鐘。）。
「吓…而家已經見少左好多喇喎…」Jenny聽到之後扁扁咀：「之後仲要再見少啲…」
「係呀。」我要氹返Jenny先：「不過我應承你啦，就算每個星期六練波練到幾攰都好都一定會返出黎同你拍拖食飯既!」
「唔。」Jenny點下點下頭，不過個樣仲係唔係幾高興。
「你幾時要開始練波呀？」Jenny問。
「聽日已經開始喇。」我答。
「咁即係聽日你都唔得閒陪我啦。」Jenny dup低頭望住碗米線講。
咦，呢個情節係咪似層相識？
阿冰個男朋友咪話又要上莊又要讀書所以唔得閒理佢？
而家我既角色就變左阿冰男朋友咁，令到自己個女朋友唔開心。
明明一開始Jenny仲好替我入選到校隊而高興，而家反而因為同一樣野而唔開心。
我要氹返Jenny開心先得。
（待續）
留言列表
{{ article.title }}
