三十七 返到嶺大既時候，已經十二點半。 我同肥仔賢佢地唔同方向，佢地去某棟hall搵佢地既莊員，我就返去自己hall訓覺休息。 「記得投我地信任票呀。」肥仔賢臨走前不忘叮囑我去投票。 順帶一提，以我所知，今年既系莊係得一支莊參選，所以唔會有所謂既競莊出現，只會向參選既莊投信任或者不信任票。 其實我諗得一支莊都一定上到架啦？ 「一定啦。果陣講過，就算我最後決定唔上莊，但你地有乜野幫到手既我一定會幫既。而家只不過係投信任票，easy job喇。」我輕快咁答。 「多謝你啦！」Amanda都向我道謝。 「客咩氣吖。」 「咁我地都走先喇，要返去搵莊員了。」肥仔賢向我道別。 Amanda都向我揮手，佢揮手果陣胸前果兩團肉球上下係咁震…睇到我眼都突埋。 希望響黑暗中Amanda睇唔到我望實佢個胸。 望住佢地漸走漸遠既身影，我諗緊其實佢地咁忙上莊其實究竟係為乜？我覺得佢地好辛苦，好似唔止係燃燒緊青春同GPA，直情係燃燒緊生命。 而且只係得一支莊參選，就算hea搞莊務都一樣好大機會可以上到啫，何必搞到自己咁辛苦？ 好彩果陣決定唔上莊啫。 我諗我同佢地對上莊既價值觀好唔同。不過佢地鍾意就好。 我都轉身返hall了。 返到hall，send左message比Jenny，沖埋涼上床休息都成一點幾了。 望住阿熙張吉床，突然諗起唔知阿熙今晚會唔會比Cathy食左呢？ 諗起佢之前大義凜然咁講道理果個樣，我諗應該唔會呱。不過男人係用下體諗野既生物，所以有時真係好難講。 總之，第二日返到黎既時候阿熙已經返到，仲響自己張床度訓到隻豬咁。 我諗起細妹試過搵水淋醒我，如果我而家咁做，阿熙會唔會反面呢… 都係唔好亂黎，我知呢個同房好兄弟唔係真係咁玩得… 總之果日我叫醒左佢，之後練完波再返去港島果面搵Jenny拍拖。 平凡的一天。 * 十月三十一日。 呢日係萬聖節，對一般香港人黎講，可能只係普通既一日，畢竟萬聖節又冇假放，節日氣氛又冇外國咁好。 但係呢一日，對我地學校所有既hall莊黎講，都係一個好特別既日子。因為我地學校所有既hall都會化身做鬼屋，hall莊會將hall既某啲部份徵用並且裝飾到成間出面玩果啲鬼屋咁，然後再由hall莊既莊員同埋工作人員（student helpers）響入面扮鬼，嚇下啲學生。 簡單黎講就係嶺大宿舍版本既海○公園全城哈囉喂。 司徒條仆街約左部份既層友組織左個鬼屋團，我見果晚冇人約所以都加入左呢個全仔麻甩鬼屋團。 至於阿熙？佢又係要去補習。 但睇得出其實佢想去，但話補習個學生改唔到時間所以去唔到。 睇黎自從阿熙多左參加羣體活動之後佢都外向左。 萬聖節當日傍晚，我同阿冰聽完個學校舉辦既無聊講座，之後響校園入面百無聊賴咁散步，諗住行一陣就返hall去join全仔麻甩撞鬼團。 行下行下，傾下傾下… 我發覺好想知道Jason同阿冰去海○公園玩成點，所以明知聽完之後個心一定會唔舒服，但都係忍唔住問：「係喎，你唔同我地re u，咁你同你個Jason去海○公園玩成點呀？一定好好玩啦？」 屌，我語氣入面好似有陣酸味添。阿冰應該察覺唔到呱？ 阿冰望左我一陣。 「哼哼，你個樣嬲爆爆咁喎，做乜咁問？」阿冰又用佢個古古惑惑既樣望住我反問。 咦？乜連我個樣都擺埋出黎咩？ 「冇呀，邊有啫。我問下咋嘛~咁果日我地都玩得幾開心。」我故作輕鬆咁回答。 阿冰突然搖一搖我隻手臂，再指一指我，笑笑口咁話：「哦！Camp草呷Jason醋~」 喂，你識讀心架？ 原來你先係讀心淫探！ 「…」我唔識比反應。 「哈哈！玩下你咋~你睇下你個樣呆到~哈哈~」阿冰原來係整估我：「你真係好搞笑~」 好似已經唔係第一次比阿冰咁玩。 成日都話我搞笑黎笑我戇鳩… 哎呀，我真係比娘娘你收服左喇~ 「哎呀…」我尷尷尬尬咁R一R個頭… 「唔好發呆啦～最多我應承你下次Re U一定到~」阿冰又搖一搖我手臂：「況且你地上次去哈囉喂冇我都一樣玩得咁開心啦！」 唔係架…上次Re U果陣我覺得爭咁啲野架…就係爭左你… 不過呢句唔出得街… 咁講同間接表白冇分別… 「咁你同你個Jason又玩得開唔開心呀？」我都係轉一轉話題。 一聽到呢度，阿冰既笑容突然生硬左。之後佢諗左一陣，好似先下定決心咁講出黎：「嗯，我冇同佢去到海○公園玩。」 吓？ 冇去到？ 「佢話佢莊務太繁忙，所以臨時臨急話陪唔到我去。」阿冰苦笑左一下。 「你唔同我講既？」不過阿冰最近都冇提起佢男朋友。 而我講過，儘量唔主動去提佢男朋友啲野。 其實，我想分擔下阿冰既唔開心。 阿冰聳一聳肩，不置可否咁講：「講左出黎，都改變唔到事實架啦。」 我諗左一諗，問：「其實你想唔想玩鬼屋架？」 阿冰諗都唔駛諗，秒答：「梗係想啦。我既夢想係同男朋友一齊去玩鬼屋，然後匿響男朋友背後等佢保護我架~」 咦？你既夢想同我既夢想咁似既？ 我望一望手錶，都成七點幾，我諗都唔諗，拖住阿冰隻手就走。 （待續）
文章標籤
全站熱搜
留言列表
{{ article.title }}
