OCAMP故.jpg

 

三十一

 

「喂!過黎睇下食乜野先啦~」阿冰既聲音將我拉返現實。

 

「哦,都係食返果啲啫。」都係好似尋日咁食碗生牛肉湯河算。

 

「你可以試下新野架喎~」阿冰提議。

 

「我專一吖嘛!」我學阿冰咁講。

 

其實係我諗唔到食乜…

 

「哎呀呀~你抄我既!」阿冰扮嬲咁講。

 

佢個表情…佢呢個扮嬲既表情…好迷人…

 

好迷人…

 

好迷人…

 

好迷人…

 

阿冰突然彈左我額頭一下。

 

「喂~你呆左咁望住我做咩~」阿冰都係果個扮嬲既樣。當然眼內全無怒意。

 

頂,唔得喇,再係咁我會比阿冰迷到痴呆架喇。

 

「冇呀,我都冇望你,我望住你前面啲空氣咋嘛。」我發揮鳩噏本色。

 

「痴線!」阿冰終於hold唔住個嬲樣,笑左出黎:「你真係好搞笑呀!」

 

又係呢句?

 

即係笑我戇鳩喇…

 

由於時間都唔早,所以唔駛等好耐就入得餐廳,我地就響笑笑鬧鬧咁樣閒聊既情況之下入去。

 

一坐低我地就叫野食。我最後都係好專一咁叫返之前兩次黎既時候都叫既生牛肉湯河。

 

其實我真係對越南野唔係特別喜愛,連食兩日都唔係幾開胃,不過都係果句,醉翁之意不在酒,我唔係黎食越南野,而係黎食左阿冰…呃,唔係,係黎同阿冰食野先啱。

 

見到阿冰真係好開心,個感覺就好似當年中四同Jenny正式拍拖之前日日返學都好期待見到佢一樣。

 

Jenny…

 

係喎,我有Jenny架喇喎,就算真係鍾意埋阿冰都好,我都要好好控制自己…如果有一日唔小心踩過條朋友的界線我就仆街鳥。

 

「喂!」阿冰把聲將我由胡思亂想中帶返黎現實。

 

「係?」

 

「你由響鋪頭門口等位已經發緊吽哣。」阿冰又彈一彈我額頭:「你有野煩惱緊?」

 

我既煩惱咪係你囉…

 

 

呢啲說話絕對唔能夠講出口。

 

不過,我好有信心,可以控制得住自己,以好朋友既身份,陪伴響佢身邊。

 

一諗到呢度,我個人豁然開朗,然後鳩噏:「冇呀,其實,我諗緊點解你咁鍾意食呢間越南野?」

 

「呵呵~冇得解架,鍾意咪鍾意囉。」阿冰回答,然後眯一眯眼望住我繼續說道:「你係咪唔想食越南野?」

 

「唔係啦,我無所謂。」只要係同你一齊食就得喇~

 

「哎呀,你如果真係唔想黎可以同我講架,我提議下啫,又唔係一定要黎。」阿冰完全無視我句無所謂。

 

哎呀,早講啦。

 

 

不過你就算早講,我都係無所謂的,最後都係會照你既喜好黎食越南野。

 

我只要係同你一齊食晚餐就得啦。

 

「唔係呀,真係無所謂架。」我解釋。

 

「唔,你話係就係喇。」阿冰個樣唔係幾信我。

 

話說回來,雖然阿冰係一個女神級數既女仔,但係佢並唔係似寵生嬌果隻類型,好多時同佢做野又好去街又好食飯又好都有商有量,係一個好女仔黎。

 

至少冇公主病。

 

好似今次咁,其實佢都冇執意一定要黎食呢間越南野既。

 

阿冰既男朋友真係有福氣。

 

不過我都唔弱,我有Jenny響我身邊。

 

冇幾耐之後,我地叫既野食都到左。我地一路食一路傾計。

 

「尋日做咩唔覆我messages啫~」阿冰又問:「諗住搵你傾下計都唔得。」

 

本來我想反問點解你唔同你男朋友傾?

 

不過我話過唔會主動響佢面前提起佢男朋友,因為最近一提起佢男朋友佢都好似唔係幾開心咁。

 

我想見到既係開心又活潑既阿冰。

 

如果有朝一日,阿冰肯主動向我透露有關佢男朋友既心事的話,我好樂意去聆聽同埋幫助佢。

 

真心話呢?

 

又黎?

 

屌,唔答呀。

 

anyway 我連阿冰同男朋友係咪出左問題都唔知,淨係知道佢男朋友因為大學生活好忙而冇辦法抽到時間陪阿冰,似乎係因為咁令佢好唔開心。

 

當中唔知有冇內情呢?

 

「冇計啦,可能係iPhone 個notification function short左。」我說:「又或者我唔小心㩒走左,所以我都唔知你搵過我。」

 

*

 

都係果句,如果當時我有將Jenny可能睇到阿冰既訊息既可能性認真考慮清楚既話…

 

我應該就要響呢一刻就做出一個決定…

 

可能係同阿冰保持返一定既距離。

 

又或者至少要自我控制得更加嚴謹。

 

又或者係比多啲安全感Jenny。

 

但係我冇…

 

所以之後先至會發生左好多唔同既事件…

 

有喜。

 

有悲。

 

 

又離題了。

 

先繼續回憶吧。

 

唔好劇透咁多了,我相信樓主係唔會棄故的。

 

之後你地就會知道發生乜野事了。

 

*

 

「哼哼。講大話啦你!」阿冰又黎果個扮嬲既樣:「掛住陪女朋友啦你,有異性冇人性呀你!」

 

其實你都係異性啫…

 

「我似啲咁既人咩?」

 

「哼哼,唔係似,直情係!」阿冰扮嬲地道。

 

嗯…咁某程度而言我都因為陪Jenny而冇特登搵阿冰。

 

佢都錯唔晒。

 

之後我地轉移話題繼續傾計。

 

「喂,你真係叫返生牛肉湯河架喎!」阿冰問。

 

「都話我專一啦~」講笑啫,其實下次可以試下香茅豬扒。應該都會幾正。

 

「你呢啲叫偏食!」阿冰隨手響佢碟扎肉雞絲撈蒙夾左塊扎肉比我:「試下其他啦,下次陪我黎可以試下呢款撈蒙。」

 

woo~女神夾佢件扎肉比我食~~

 

等等?下次?咁咪即係連續三次同阿冰食飯都係食越南野?

 

「下次又食越南野?」我問。

 

「係呀,唔好咩?」阿冰笑笑口咁望住我。

 

「哎呀,咁不如我地返學校canteen度食算喇…」我抗議…

 

「你唔係啱啱先話無所謂既咩?」阿冰古古惑惑咁望住我:「上次你唔係先話學校canteen難食既咩?」

 

「呃…咁不如去食肯德○啦~」我駁唔到,唯有提議另一間餐廳。

 

「呵呵~到時先算啦~」阿冰眨眨眼繼續話:「到時我話食越南野你食唔食先~」

 

「哈,到時先算啦~」

 

「哼,又抄我!」阿冰又扮嬲。

 

(待續)

arrow
arrow

    葉開葉開 發表在 痞客邦 留言(0) 人氣()