葉開葉開的部落格

 
三
趁住食完飯沖完涼又未開始入房會合我啲組員，就梗係盡下好男友既責任向Jenny報個靚到。
嘟...嘟...「衰人! 肯打黎喇咩？」Jenny一接個電話就話下我, 不過語氣其實都係撒下嬌。
「錫返~咁我玩O camp唔得閒吖嘛，轉過頭又要再玩啦，都係抽空打下比你架咋~」我氹下佢。
「算你喇~個camp好唔好玩呀？」Jenny問。
「Ok喇! 不過好攰呀…哎呀，組爸催我喇，唔講住, 再傾~」唔係組爸催，係我吹(水)~難得黎到camp梗係唔想傾咁耐電話, 平時仲傾唔夠咩～
「吓，咁快...」想像得到Jenny又扁扁咀...
「冇計啦，再傾~bye~」我好賤咁好快cut左線。
呼~真係可以抖一抖喇。
響呢個時候, 我先發覺原來附近企左個人。啱啱洗完頭濕濕地既長髮, 深深既酒渦，原來係阿冰。講起黎，呢次好似先係我同阿冰第一次單獨相處。
「Hi阿冰, 咁啱既?」我向佢打招呼, 唔知佢啱啱聽唔聽到我同Jenny傾電話?
「Hi!」阿冰古古惑惑咁望一望我:「啱啱同女朋友傾電話?」
「係呀。」我有啲尷尬咁R一R個頭。佢好似真係聽到晒咁。
「好賤呀你~」阿冰仲係keep住個古惑樣, 指一指我:「咁樣cut你女朋友電話~」
「情趣既野你識條鐵咩！」好啦，我承認其實呢啲唔係咩情趣。「喂～我就話要報到所以唔入去住啫，你又唔入房玩住先?定你又要報到?」講開呢樣野, 又等我順水推舟chok下阿冰有冇男朋友先~
不過有又點冇又點? 其實都唔係好關我事~
「哈…我果個唔會要求我每分每秒都報到架!」阿冰答。噢，即係有男朋友喇。唔知點解有小小失望添! 不過見到靚女比人occupied左我諗係男人都會失望既。
「唉...今日比Simon爸爸佢地圍住我其實搞到我有啲攰...」
我今日見到佢有小小手忙腳亂都估到佢唔係好擅長應付咁多男仔圍架喇，不過又估唔到佢會同我講。可能都想搵人呻下呱?
「係咩？我仲以為你平時都比仔圍慣添!」仲諗住阿冰咁靚女平時有比狗公圍都好正常...所以我對佢今日既反應有啲意外。
「點解你會覺得我成日比男仔圍住呢？」阿冰眼斬斬咁望住我。
大佬，你照下鏡喇，你真唔知定扮唔知呀…
「我以為你咁靚平時應該好受男仔歡迎添...」我食左誠實豆沙包咁衝口而出咁講...
阿冰塊面好似突然紅左一紅，呆一呆咁望住我。
咦，其實我係咪講得太直接? 話晒其實我同佢都唔係好熟, 不過傾開計又好似幾啱傾啫...佢會唔會當埋我係其他狗公既一份子? 冤枉呀包大人, 我淨係咋。
「呀，唔好誤會, 我有果句講果句，有怪莫怪, 細路仔唔識世界~」我耍晒手又擰晒頭咁解釋。
阿冰望一望定我手fing fing頭擰擰咁既樣, 突然噗哧一笑:「你真係好搞笑~」
咦，其實呢句係咪笑我戇鳩？不過算啦，我諗我而家個樣都真係幾戇鳩。
「咦，阿威阿冰?你地響度做咩？」阿熙把聲突然出現!
我擰一擰轉頭就見到佢個童顏樣。
「你做咩好似死傻仔咁郁黎郁去?」阿熙望住我雙手亂fing既樣咁樣問我。以啱啱識左冇幾耐黎講, 呢個阿熙咁講野其實算唔算毒舌?
「冇...冇呀？」不過佢既出現都叫做解一解困左呢個有小小尷尬既moment...「我地準備去玩房game咋嘛。」
「啱喇，咁一齊行啦。」阿熙繼續講:「仲有你條友仲爭我一樣野呀。」
唔通佢指既係比我同Jenny既合照佢睇？條友又會咁好記性既。
「爭咩呀？」我詐傻扮懵。
「相呀頂你。又話比我睇你同你女朋友既合照。」阿熙答我。
又會咁堅持既，男仔黎講阿熙都算幾八卦。
「哎…好啦…」今次避唔到架喇，唯有拎個電話出黎，諗住show下入面啲合照比佢睇。
「woo...用iphone, 有錢仔~」阿熙見到我部電話就咁講。
「講呢啲。」我拎起部電話㩒㩒㩒，對住阿熙show一show左張我同Jenny好hea咁影既合照。
「咩黎架?我又睇~我又睇~」阿冰彈彈下咁彈過黎湊熱鬧~
「冇，睇下個死傻仔同佢女朋友既合照啫~」阿熙又漫不經心咁講。
「嘩~又幾襯喎~~~」阿冰又湊個頭埋黎望一望。一講起呢啲阿冰似乎好感興趣~
「係咩…Ok啦…」唔知點解其實我唔係好想比阿冰睇到。「你睇左我果個到你要比返我睇啦！」等我又黎一招順水推舟先~
阿冰擰轉頭扮聽唔到~衰妹吖。不過我都唔會堅持既。
我地三個一路傾一路行終於去到間房, 原來都差唔多齊人, 除左我地果組之外仲有幾個可能係student helpers咁既物體。
房games其實都係果啲乜鬼朱古力波, MC killer果類啦～其實都幾好玩, 呢一刻先至最有入camp feel!
玩下玩下...
大家又有啲攰，又變左傾計大會。一開始大家都係傾下閒計, 又或者係無聊中學雞野...
閒談之間得知原來阿冰成個中學生涯都係讀女校, 唔怪得知佢好似唔係好慣比仔圍咁喇。唔知佢同佢男朋友係點識既呢？
傾下傾下...
「不如大家講下你地有冇拍拖吖!」獸父Simon黎料~睇佢眼甘甘咁望住阿冰, 其實佢都係想問下阿冰有冇拍拖啫~
阿冰其實應該望到獸父Simon望住佢殷切既目光, 不過佢可能唔想講又或者至少唔想做第一個應機, 所以好似扮望唔到既目光咁。
我係咪應該呢個時候衝出黎英雄救美幫佢擋一下做第一個出聲先呢？不過講有冇拖拍呢味野其實都有啲老尷...
就響我十五十六諗緊幫唔幫阿冰擋一擋既時候, 一把雄厚既聲音突然響起。
「um...我呢，就都拍過5, 6次拖架喇，不過呢，而家就冇拖拍，但就隨時準備開始一段新戀情架喇!」呢把聲既主人屬於一個叫阿賢既組仔。阿賢係個典型肥仔，中間分界髮型，金絲眼鏡, 仲要滿面油光...話佢有拍過拖都冇人信, 仲要話拍過成5, 6次拖...
但又咁講, 雖然佢個樣好毒, 但今日同佢相處落其實佢個人都幾外向, 又幾鍾意撩人傾計, 同佢毒毒既外表完全唔同。好似呢一刻咁，其實佢講呢番說話果陣係好自信爆棚，而且又笑笑口講出黎。
「係喎，你咁靚仔又咁有型，我仲以為你起碼拍過10次8次拖添!」阿熙一副諷刺既表情咁寸肥仔賢。
「係咩？其實好多人都咁講, 哈哈...」肥仔賢那來的自信...
又好彩肥仔賢唔知醜咁認屎認屁，又加埋阿熙又潤一潤佢，大家笑左一餐之後好似對呢個話題開放左肯講左。(又或者其實大家本身都係八八卦卦咁。)
我唔知其他人係咪是旦噏，不過我自己就好坦白咁講真話:「我? 我有拍拖呀。有個拍左3年幾既女朋友。」
「3年幾都幾長喎~你地點識架?」估唔到阿冰又對我八八卦卦咁喎，係咁問我。
「冇呀，咪同班同學, 大家又鍾意大家咪響埋一齊囉～」我答得好行。不過事實係我同Jenny既愛情故事真係好平凡, 個個中學雞都係咁架喇。
「唓，答得咁行架~」阿冰答返我。
「中學雞個個都係咁架啦～」我答。
「係喎，咁冰冰你呢？你都未答。」哦, 獸父Simon終於忍唔住要指名道姓咁要阿冰答。仲有, 做乜鬼突然叫佢冰冰咁懶係親切呀？冰冰係你叫既咩！
「我? 有呀。」阿冰好大方咁答。
「哦, 係咩。」獸父Simon表情上好快咁閃光一絲不悅。「有冇相睇下呀～」
「係囉係囉～有冇相睇下呀？」
「我又想睇下佢咩樣呀！」
成間房既狗公(但唔包括我同阿熙)一擁而上圍住阿冰, 場面非常有趣!
阿冰比呢個突如其來既情景搞到有啲不知所措，尷尷尬尬咁，比又唔係, 唔比又唔係~
呵呵…又到我英雄救美既時間喇...講笑咋，我其實係想坐享其成, 等佢地搶到幅相之後先扮八卦去睇，咁就唔會好似咁狗公啦～
我望一望阿熙，條友好似食緊花生咁，好好笑。
(待續)

 
二
傾下傾下, 慢慢已經過左集合時間, 睇黎都差唔多時候出發。
我望一望周圍, 似乎大家都到得七七八八了。
組爸Simon一路望下手中張list一路又望下我地, 皺一皺眉:「我地仲爭一個組女未到...」
組媽Cathy就話:「一係等我打一打比佢喇。」
我數一數我地果組, 加埋我在內總共4男5女, 又真係少左1個。
「屌那星...連集合都遲到, 冇啲責任感...有冇搞撚錯...」Simon細細聲口噏噏，以為冇人聽到。條友係遲到啫，又唔駛咁快屌住既, 比組仔組女聽到咪盞覺得你好冇風度~我對Simon既印象即刻差左。
響呢個時候, 背後突然響起一陣急急既腳步聲, 我擰轉面, 發現有幾個男既student helpers帶住一個女仔急急步咁行緊過黎我地呢組。
入黎既係一個好靚既女仔，黑色長直髮, 大眼睛，兩頰仲有個深深既酒渦，呢一刻佢似乎因為跑住趕過黎所以塊面濕濕地之餘仲要紅紅地, 又喘住氣咁，真係睇到都覺得好吸引。
我忍唔住左兩眼, 再望一望Simon, 條友仔上幾分鐘先屌完呢個組女遲到, 而家就兩眼發光咁住人, 真係成副獸父咁既樣。
不過唔止Simon, 仲有Alan同其他組仔仲有附近既男helpers都望到呢個女仔實一實。
除左阿熙。
佢只係望住個女仔一眼, 之後就繼續同其他人傾計。佢個樣又唔似係怕醜, 只係好似冇乜興趣咁。
「嗄...唔好意思呀，啱啱巴士塞車, 我遲左小小...」個女仔唔好幾意思咁講。
「唔緊要啦！香港啲交通係咁架喇...唔係呢度塞就果度塞...你好似趕到好攰咁，快啲坐下先啦！」獸父Simon變臉速度極快~
「你係梁冰冰? 我係你既組媽Cathy呀！黎緊呢3日多多指教喇!」Cathy保持住溫柔既微笑向住個女仔講。
「係呀，叫我阿冰得喇...真係Sorry呀！」阿冰仲係勁唔好幾意思咁講。
「都話唔駛講唔好意思既~」獸父Simon一邊搶左Alan手上拎住既物資, 一邊同阿冰講:「我係你既組爸Simon~有啲朋友鍾意叫我西門, 哈哈哈…嗱，呢袋係你既物資黎，快啲去廁所換左入面件camp tee先啦！我帶路?」
嘩，狼到帶路去女廁...
阿冰都未黎得切反應就比獸父Simon半拖半逼咁拉左出function hall, 搞到我地全組人都呆晒...
「哎呀, 啱啱仲屌緊人遲到冇責任感, 轉個頭就對人大獻殷勤...」阿熙喃喃地說。
我都話只係獸父Simon自己以為細細聲冇人聽到架喇, 其實連阿熙都聽到。
「唔唔，成隻禽獸咁。」我望一望阿熙, 一本正經咁點頭認同。
「呃…又唔係既...可能Simon爸爸都係熱心想幫下手啫...」Cathy應該聽到我同阿熙既對話, 有小小尷尬咁嘗試同獸父Simon辯護。不過睇佢個表情似乎佢自己都唔係幾信。
「係啦係啦～Cathy媽你話係就係啦～」阿熙對住Cathy笑一笑。估唔到佢個小朋友樣又笑得幾陽光。Cathy比佢既笑容電到好似呆左一呆咁~
雖然個氣氛突然有小小怪, 不過我地都係繼續傾下計, 好快獸父Simon就帶住阿冰返黎。
其實靚女真係屈機。阿冰換左件camp tee, 加埋本身著住條熱褲同波鞋已經好鬼死吸引。如果我唔係有左Jenny既可能我都會忍唔住好似獸父Simon咁狗衝。
不過下都得既~尤其是佢而家比獸父Simon纏住, 我對眼就可以唔駛收收埋埋咁~
下下, 其實都唔係左好耐...阿冰突然擰轉頭望黎我呢面, 我收唔切掣同佢四目膠投! 嘩，佢又唔係特登放電, 但果下真係有啲啲觸電既感覺...
我有啲尷尬咁同佢笑一笑, 佢又同我禮貌上咁笑一笑點一點頭...
「好喇~終於都齊人喇，不如我地正正式式再介紹一下大家啦！」Cathy提議。
「大家好, 我叫阿威...」又黎無限輪迴...
冇幾耐之後就有個MC出現, 又係搞下氣氛嗌下cheers咁，之後我地就正式搭旅遊巴去我地今次既camp site。
其實去o camp玩既野都係果啲。朝早玩下mass games, 其實好熱好鬼辛苦。好似玩毛毛蟲(即係成班組仔組女坐響地下用腳夾住前面果個, 成條人型蜈蚣咁鬥快過終點)果陣諗住可以夾下女抽下水, 點知比個肥婆Yuki夾住, 想拉佢向前行都差啲拉唔到, 好鬼死灰。
跟住玩下city hunt, 做下on9 tasks。Simon同Cathy都好照顧我地(雖然獸父始終都係向組女們尤其係阿冰獻殷勤多啲), 而奶爸Alan就唔係全程跟足我地, 有陣時佢要去做student helpers幫手hold games, 呢個似乎就係組爸媽同奶爸既分別。
玩緊既時候, 唔止獸父, 其他組仔似乎都有意無意咁圍住阿冰R水吹, 又或者幫下佢手獻下殷勤咁，我就樂得用呢啲時間下阿冰。
不過, 阿熙似乎由頭到尾都冇乜打算去加入佢地, 最多只係同佢有普通交流, 又唔多見佢真係女咁佢...唔通呢個小朋友係基佬？
玩緊city hunt既時候我忍唔住行埋去問佢:「你覺得阿冰靚唔靚?」
「靚呀～」阿熙上下咁打量下我, 好似有啲奇怪我會突然咁問佢。都係既，一個新相識唔熟既人突然咁問自己某個女仔靚唔靚。
「咁你又唔去同其他組仔一齊狗衝?」我問。其實呢條問題好戇鳩。
阿熙白左我一眼:「咁你又唔去?」
係喎，其實我一路都係得個字。
「咁我有女朋友就唔去撩女仔喇。不過下總是有的。」我好誠實咁同阿熙講。
「你唔比我都係有女朋友所以連都廢事?」阿熙回答:「況且做到狗公咁你覺得阿冰會鍾意咩？」
我離遠望一望阿冰, 佢比班仔（其實主要都係獸父Simon）圍到好似有啲手忙腳亂。佢咁靚女，我仲以為佢平時實係收開兵添。
「都啱既。」我話鋒一轉, 一手cool落阿熙條頸度，懶熟咁問佢:「你有女朋友? 有冇相睇下?」
呢個世界上有啲人你可能只係第一次見佢面, 但唔知點解已經好有親切感, 而阿熙就比到呢種感覺我, 好似係識左好耐既朋友咁, 而且我覺得佢只係外冷內熱, 熟左既應該好多計傾。btw我不是基的。
更何況我都好想睇下呢個寸柒柒但又好小朋友樣既女朋友係咩樣。係咪有戀童癖? 定純粹係正太控?
阿熙望一望我, 一副無我咁好氣既樣, 響個銀包入面拎左張貼紙相出黎比我睇。
嗱，我都話佢個人唔係真係咁cool架喇! 係真係寸既, 應該會一野就屌柒我話關我撚事。
我望一望張相, 見到阿熙搭住一個靚姐姐既膞頭, 個靚姐姐好pure好true。不過又老老豆豆, 個靚姐姐同阿熙就唔係幾襯，個靚姐姐隔住張相都散發住一種成熟既氣場, 但係搭住佢既阿熙就成個小屁孩咁款。
我仲以為阿熙既女朋友會係一啲好似蘿莉咁既幼體添。
「你地都幾襯吖~」我鳩噏。
「係咩…哈哈…」阿熙傻笑, 估唔到佢都有呢一面。之後佢突然對住我伸一伸手。
「?」黑人問號。
「你果個呢？等價交換呀！」阿熙手肘撞一撞我心口。
都啱既。
我正想攞我銀包張相出黎, Cathy突然走過黎:「喂，你地一陣再傾計喇，我地要行架喇。」係喎，唔記得左其實我地係玩緊city hunt添。
我對住擺出個無何奈何既手勢。佢望一望我, 對住我舉起隻中指。
估唔到咁樣開始同阿熙開始真係有幾句傾, 係開心既。btw我真係非基。
玩O camp其實都唔係輕鬆。不過老實辛苦得黎其實我又覺得好青春。入大學唔係應該就要係咁既咩？而且一路玩唔同既遊戲, 組員們都越黎越多交流, 大家有傾有講咁，食完飯大家坐響度既時候Simon又會同大家玩下枱game, 真係幾開心架。
唔經唔覺就去到夜晚嘞。食完飯大家沖完涼就響某間房入面玩下房game。
「今晚唔訓覺!!!」Simon大叫。痴撚線, 其實我好攰，諗住玩陣房game吹陣水就訓覺。你個獸父都係為左睇下有冇機會埋下阿冰身啫...
不過人一世物一世, 參加得o camp, 呢啲房games一定要玩呢啲既!
我入去之前, 都係打個電話同Jenny交代下先。話時話, 今日全日都冇check過電話...噢, 原來Jenny send左十幾個sms比我, 不過內容都不外乎係自己報下到, 幾點食飯沖涼又或者好掛住你呢啲野...
其實我真係想講, 你唔駛樣樣野都同我講的, 我又唔會唔信你既~所以可唔可以你都唔好逼我成日報平安呢…
不過, 我講就凶狠, 做就碌撚~都係嗱嗱臨報個平安先~
(待續)

 
一
「你呀…聽日去o camp唔準女仔呀！」電話中傳來Jenny撒嬌既聲音。
「係喇係喇...放心喇...到時咁攰邊得閒吖~」我一面望住電腦個mon一邊心不在焉咁答。
「仲有仲有~玩得幾攰都好都一定要掛住我~~~」Jenny繼續撒嬌...其實呢，佢已經撒左幾粒鐘啦，我傾電話傾到好攰…不過當然唔可以表露出黎。
「梗係掛住你啦！最掛就係你!」我對眼仲係望住個電腦mon, 上緊某個討論區搵緊J圖睇...
「O camp有啲遊戲好癲架~要小心唔準掂到第二個女仔！」Jenny繼續講。
「係啦係啦…到時望都唔望佢地添呀！」其實去到玩遊戲都身不由己架啦…不過冇理由咁答自己女朋友既啫...繼續睇下有乜J圖先...呢條女好似唔錯喎...
「仲有小心啲唔好整親呀！你知你平時幾唔小心, 踢波又整到周身傷晒！」Jenny繼續關心我...
「知啦老婆大人!」我望一望個鐘, 原來已經成凌晨1點半...「都夜啦，我要訓架喇，聽朝仲要一早起身去camp...」
「咁你聽日入左camp之後我冇得成日搵你喇嘛...所以先唔捨得收線...」Jenny把聲好似扁扁咀咁...
「乖喇，聽朝起身再message你啦！」都要氹下佢既。
「唔得唔得~~你要打比我!」Jenny繼續撒嬌...
「你都未起身...」話就係咁話, 不過Jenny應該都係會堅持要我打比佢。
「都可以打比我架嘛~~~我要響你入camp之前再聽下你把聲~~~」嗱，都話架喇！
「好啦好啦～我一定會打比你同你傾一陣。我入camo咋嘛, 又唔係唔返黎...」女朋友都係要氹下既:「返到黎即刻同你行街街, 好唔好?」
「咁好喇...早抖老公!」Jenny有點依依不捨...
「嗯嗯~早抖早抖！」終於可以cut線lu~
「記住記住! 入到camp唔準媾女!」Jenny仲係唔肯cut線...
「知喇~有左你仲唔夠咩～邊會咁夠膽再去媾女! 好喇，真係訓喇! 早抖喇老婆大人...」都係要氹多一氹先得！
「嗯…早抖老公!」今次終於真係cut線...
我再望一望個鐘, 其實已經傾左好幾粒鐘, 點解女人咁鍾意傾電話既呢？
*
我同Jenny唔經唔覺已經拍左成3年幾拖, 當然我絕對唔係唔鍾意佢，只係我個人其實唔係咁鍾意傾電話。啱啱拍拖果陣傾電話都仲頂得順，但係日子一耐左, 有時返到屋企都會想做下自己野, 不過Jenny就話成日都掛住我, 所以返到屋企都要keep住傾電話。我又衰既, 都唔夠膽同佢講話我唔鍾意傾電話, 咁咪搞到自己囉。
唉…我係咪要去到同佢結婚先至唔駛晚晚傾電話呢？
我熄左電腦熄埋燈訓上床, 望住個天花板, 諗下諗下...
Jenny個樣斯斯文文又可可愛愛咁，佢叫我唔好入camp媾女, 其實係咪應該係我擔心返佢入左大學之後唔好比人搶走呢？不過又好彩佢話對o camp呢啲冇乜興趣，所以就冇去報, 如果唔係我都幾驚好快就會有狗公埋佢身!
Jenny讀書成績一向比我好, 所以佢入左港大。不過講起黎都好彩中四果陣同左佢拍拖, 果陣我既成績只係中規中矩，同左Jenny拍拖之後反而係佢響學業上幫左我好多好多, 先後順利搞掂個會考同高考而家仲入埋大學...邊個仲夠膽講中學生不應談戀愛?
諗下諗下...唔知聽日O camp有冇靚女呢？上次返大學註冊果陣見過有幾條女都唔錯...唔知佢地有冇玩O camp呢？
又諗下諗下...諗下諗下...不知不覺間終於訓著左覺...
*
第2日我6點幾一早就起左身, 早到連老豆老母同細妹都未起。我經過阿妹間房時, 忽然想入去整蠱下佢~
我走入去, 見到細妹仲響張床上面訓到成隻死豬咁，仲要流晒口水, 哈哈, 個樣真係好鬼搞笑!
我走埋去佢隔離, 大叫:「死女包! 夠鐘起身屙夜尿啦！」
細妹比我嚇到成個彈起, 之後望住我一巴打落我手臂到:「屌你嚇撚死人咩！」
嘩屌，好撚痛!「咪咁爛口啦～冇男仔鍾意架!」
「跟得你條仆街多呀，你理撚得我啫！」佢好似真係有小小嬲。
「喂～你唔係咁就嬲下嘛~玩下啫~」
「搵鬼同你玩呀！你唔係去o camp既咩！快撚啲閃咪撚阻住朕訓覺!」細妹又將張被㩒過頭。
「好啦好啦！拜拜啦！」
細妹冇應我, 淨係對住伸左隻中指出黎~
哈, 我同我細妹由細到大既相處模式就係咁...你整下我又整下你，我去完camp返到黎佢啖氣就應該下左架喇!
我落左樓之後就打左比Jenny報個到~聽佢講野既語氣...佢肯肯定未訓醒!
唉，未訓醒就不如要我send個message就算啦…同佢簡單傾左幾句就氹返佢訓嘞！
今日參加既, 係我就讀既社會科學學院既o camp。搭下搭下車, 發下吽哣，唔經唔覺就返到去大學 campus, 一入到門口已經見有一大班唔知係student helpers定係組爸組媽響度歡迎緊我地呢班freshmen入黎!
一路同班student helpers傾下計, 一路行去我地個集合地點(campus入面其中一個function hall)。臨入去之前, 我停低諗左一諗, 都係盡一盡好男友既責任, 拎一拎個電話出黎打比Jenny先~
嘟...嘟...「...喂?」Jenny把聲好似都未訓醒咁。
「我去到啦，而家入去報到~」其實我都同緊你報到~
「嗯嗯…玩得開心啲...唔好識女仔...」Jenny把聲有氣冇力咁款，但都係要提我唔好識女仔。
「知啦知啦…我應承你啦！你而家好好休息下先啦！」我都係時候要入去架啦～
「嗯嗯…早抖...」
「拜拜!」Yeah! 我自由啦！至少黎緊o camp呢3日唔駛煩要成日同Jenny傾電話~仲可以自由自在咁下我個系啲女~不過我最多我諗都係，我唔係玩家黎，對Jenny一條心架!
廢話少講, 我即刻入去先!
一推門進入個function hall, 已經覺得個氣氛好熱鬧! 大家又傾下計, 有啲仲high到尻叫出黎! 而啲老鬼又好比心機咁撩下啲freshmen傾計(又或者係啲組爸獸父撩組女), 總之我就覺得好熱鬧啦！
行下行下就行到去我果組度，一行到埋去都未坐低已經有兩男一女走埋黎~
「早晨呀阿仔！歡迎你黎到我地個o camp! 你叫咩名呀？」呢個有小小猥瑣既男人應該就係我組爸Simon, 之前佢都打過比我提我o camp啲野。
「我叫梁建威, 叫我阿威得喇!你係組爸Simon?」我應一應佢。
「哦！原來你就係梁建威! 係呀！我就係你地既組爸Simon啦！」
我眼光望一望去佢隔離個女仔度。呢個女仔個樣幾靚女, 及肩長髮, 又好似有小小大姐姐既感覺, 感覺上黎緊好似好會照顧我地呢班freshmen咁，總之比我既第一印象都幾唔錯。
佢見我望住佢，於是笑笑口咁自我介紹:「Hello~我係你地既組媽Cathy呀！」
之前同我聯絡既都係Simon, 所以我都係而家先第一次知道我組媽就係呢個靚姐姐Cathy~
「Hello Hello~」我對住靚女媽媽揮下手~
「我叫Alan, 係你地既奶爸! 嗱，廢話唔講嘞，呢份野你既, 入面有件camp tee, 你去一去廁所搵左件衫先喇。」呢個男仔帶住黑色粗框眼鏡, 一頭短髮, 比一比左袋物資我。老實講，佢個樣一啲都唔起眼。
「快啲換埋件衫返黎同埋我地傾下計啦～」Cathy指一指隔離幾個男仔女仔，睇黎應該係我既組mates。
「Hello~咁我去換一換衫好快返黎!」我對住班組mates輕輕打過招呼就拿拿淋拎埋袋物資去換個靚衫~
嗯，男既冇乜點留意, 不過女既就好似一般般啫~都係唔夠Cathy媽媽靚! 靚得黎仲有小小成熟既韻味~
我好快就換完衫，坐返埋去同大家傾下計。
「你好呀！我叫做阿熙!」一坐低, 就有個靚靚仔仔但係個樣好細個成個初中生咁既男仔同我打招呼。定其實呢條友真係啲乜鬼野神童, 14歲就讀大學呢？
「我叫阿威...」我又講多次...
「我叫Yuki~」我望一望過去, 有個肥婆向我打招呼...我仲以為叫親Yuki都應該係靚女添, 佢似乎唔係好襯呢個名...
「你好, 我叫Amanda~」呢個女仔正正常常，樣唔算太靚，但都叫順眼。不過佢對波好大...
一路大家互相打招呼...
一有新組mate到又介紹多次自己...
「叫我阿威得啦…」
大家又互相吹下水...有時Simon同Cathy為左推動下氣氛都會撩下我地傾計~
「係喎~點解你地會揀黎呢度讀Social Sciences既?」Cathy問下我地。
「哦～因為Social Sciences好似好多野學咁嘛！」係鬼! 我本來諗住至少同Jenny入同一間大學, 不過鬼叫我高考成績唔夠佢好咩！Jupas咪派左我黎呢度囉！不過, 我有大學讀都算係咁架喇，大把高考生冇U讀!
大家傾下傾下, 嗌下嗌下, 都差唔多夠鐘了...
(待續)

序
我響廁所入面對住塊鏡整理一下自己個頭，搞一搞件裇衫同埋西褲，唔，應該都幾試正。
之後出廳著埋襪同對皮鞋，開門準備出去。
「我出去啦！今晚你食自己啦～」我向住屋入面大嗌。
「知啦長氣！」屋入面有把女人聲回應返出黎。「你平時要當值全日唔響屋企我都慣架啦！」
「唔當值邊有錢養妳啫~」我講出事實。
「口甜舌滑~你當更果陣咪又係掛住打排球~」屋入面既女人還擊…
嘩，呢個真係世人對消防員既誤解，其實除左打排球，仲有好多訓練或者要keep住保養啲消防設備，咁真係有事發生既時候我地先可以用最佳狀態去救人架嘛…
「哎呀～唔講啦，我真係夠鐘出門口，咁先趕得切去見證阿熙註冊果一刻！」我都係唔再爭辯，再拗落去都唔知幾時出到門口。
今日係我個好兄弟余正熙結婚既大日子。講起呢條友，我由入大學玩o camp果陣已經同佢好有緣。我地唔止同系，o camp同組，而且又係同房，之後又一齊入左大學足球隊。讀大學果3年我地互相扶持，可以話係我響大學入面最好既朋友。佢今日結婚冇搵我做兄弟，其實都有啲唔開心，不過佢班兄弟我一個都唔識，可能係因為咁所以先唔搵埋我做兄弟呱。
根據返阿熙之前派帖果陣所講，今次我係會同返o camp既組mates一齊坐既。
我上到巴士，搵到個位坐低。我望住塊玻璃，望住自己個倒影，睇落都應該似特別打扮過？
嗯，其實我都唔係好知其他人睇唔睇得出。不過同我平時相比，我真係有打扮過下，以一條麻甩佬黎講，算係咁啦？
點解我咁在意自己今日既打扮？除左話係因為今日係我好兄弟娶老婆之外，仲有就係因為…今晚應該會見到佢。
好似自從大學畢業禮之後，都冇見過佢了…連上次派帖果陣，佢都因為唔響香港冇黎到…
幾年冇見，唔知佢而家過成點呢？
我個人慢慢陷入回憶當中…
（待續）

 
大家好。