三十四
由於我同Cathy都想阿熙去既關係，所以我同佢一人夾一半錢請阿熙去海○公園。
我就無所謂喇，屋企比既零用錢我都多到駛唔晒。
當然我同阿熙講係我請佢去。
阿熙兩眼發光咁話ok。
雖然佢話會還比我…不過其實我都冇所謂，反正上次Re U既錢佢都未還…
…
btw阿熙呢條友對錢都幾執著，所以要氹佢其實都幾易…
*
另外，我從Cathy口中得知阿冰都唔去。
我有啲失望，於是響某次同阿冰響學校canteen食飯既時候問下佢點解唔去。
「Jason話同我去呀！」睇得出阿冰好開心。佢雙眼發晒光咁，直情同阿熙見到地下有張一百蚊紙既表情一模一樣。
「咁你可以去兩次架嘛。」我嘗試勸下阿冰。
我想阿冰同我一齊玩鬼屋。
「唔喇，玩第二次已經唔好玩架喇。」阿冰眨眨眼咁回答。
好羨慕Jason添。
作為一個冇情趣既男人，我係冇同Jenny去過海○公園全城哈囉喂既。
呃，不過今次其實唔關我冇情趣事。
就咁海○公園就當然去過，但係Jenny唔鍾意貼錢比鬼嚇，所以佢一律係唔玩鬼屋既。
其實我有個夢想，就係同女朋友一齊去玩鬼屋，等佢好驚果陣時可以攬實我、橋實我。
不過我冇同Jenny講過呢個夢想，因為我唔想佢勉強自己黎陪我實現呢個奇怪既夢想。
又離題了。
我成日都離題orz
既然阿冰咁講，我都無謂勉強佢了。
佢呢排個樣都係唔開心居多。即使佢對住我或者其他人都擺起張活潑既笑臉，但我睇得出埋藏響果張笑臉下面既唔開心。
而唔開心既原因雖然阿冰冇講，但我估計係因為佢男朋友。
難得Jason而家肯陪佢喎，佢梗係開心返喇。
唉，鬼叫我唔係佢男朋友咩，恨唔到咁多架啦！
「咁你都玩得開心啲喇。」我祝福佢：「不過Re U唔齊人總係唔係幾過癮。」
「唔好咁啦～都未去海○公園咁快掛住我嗱~」到佢伸長雙手拉住我塊面拉個笑容出黎，搞到我個樣好戇鳩：「黎，笑返啦。」
乜我個樣好唔開心咩？
咦？等陣。呢個動作咁熟口面既？
好似係我第一次同阿冰食越南野果陣對佢做既動作。
一諗到呢度忍唔住笑左出黎。
「嗱~笑返咪幾好~」阿冰笑笑口咁同我講。
突然我感覺到殺氣。
望一望周圍，canteen入面好似有無數既狗公望過黎我同阿冰呢度，眼中充滿殺機。
「喂，好多人望住呀。」我口齒不清咁講。
「做咩呀？尷尬呀？」阿冰依然充滿笑意咁望住我。
尷尬我就唔驚既，不過我驚一陣啲狗公群起而上，我出唔到canteen個門口啫…
於是到我將雙手拉住阿冰塊面拉塊笑面出黎…
「我唔驚尷尬呀，我係驚你頂唔住我既反擊咋!」我作出反擊! 希望阿冰快啲放手。
「哎呀，你個衰人!」阿冰冇放手，反而拉得更加緊了。
咦？我係咪採取錯左策略？點解我感覺到周圍既殺意越黎越濃既？
之後我地繼續打情罵俏咁食埋餐飯…
*
其實除左阿冰唔黎之外都仲有其他人唔黎。
當中最令人意外既係獸父Simon，佢今次Re U都唔黎。
講起黎，自從開學之後…唔係，係自從響上次樓上cafe Re U之後都冇見過佢。係連響campus都冇撞過佢，就好似響呢個世界憑空消失左咁。
我有問過Cathy究竟獸父Simon係咪退左學，不過Cathy話上堂都會見到佢，但佢變到怪怪地咁，隨左見面會打個招呼之外，就連計都冇乜點傾。
嘩，唔係我果一吻令佢有咁大心理陰影下嘛？
喂，我都好不安架! 我都有心理陰影架!
總之，果日Re U去既有我，Cathy，Alan，阿熙，阿龍，Amanda，肥仔賢同埋肥妹Yuki八個。
果然，開左學之後再搞既Re U，真係會越黎越少人出席。
老實講，搞手會好冇癮。
今次之後，唔知下次再Re U係幾時呢？
*
十月尾某個星期五，我地落晒堂之後八個人一齊響學校大門附近集合。
海○公園全城哈囉喂只係會響逢星期五、六同日夜晚舉行，而經過大家既討論之後，決定左今日呢個星期五Re U。
我對於呢個決定當然非常贊成，因為如果響星期六夜晚去海○公園既話，就會犧牲左我同Jenny寶貴既約會時間。而視乎情況，分分鐘連我都出席唔到今次Re U。
由於今次Re U係星期五晚，所以Jenny都冇乜唔開心就好順攤咁同意我去Re U。
Well…其實次次我同朋友出去Jenny都好順攤咁同意…唔會限制我呢樣果樣。
所以我成日話Jenny真係一個好女朋友。
另外除左上次掛住同阿冰食飯冇覆Jenny messages果次傾電話時Jenny既語氣係怪怪地之外，之後再講電話佢都變返好似平時咁。
咁就好了。
呃…又離題了。
總之我地八個人等齊晒人之後，就由屯門出發去海○公園了。
其實我響暑假既時候先同Jenny黎過一次海○公園。
如果係海○公園全城哈囉喂，我以前都同其他中學朋友黎過既。
我地一落左巴士之後發覺成個海○公園正門都有好多萬聖節裝飾，仲有好扮鬼扮馬既臨記已經響入口附近嚇啲遊客。
阿熙一臉新奇咁欣賞緊海○公園既報置同裝飾既時候，有個拎住電鋸既殺人鬼突然響佢隔離出現大嗌嚇佢，嚇到阿熙對住隻瘋狂爆粗，將一大堆性器官發洩落隻鬼度。
好鬼死好笑。
雖然唔係同Jenny一齊黎，但係同個好兄弟黎玩都好既。
不過，阿冰唔響度一齊Re U，總係感覺上少左啲野咁。
一諗起阿冰會同Jason一齊入黎玩，個心就戚戚然。
唉，我又唔係佢邊個，有咩資格去諗啲乜。
（待續）
留言列表
{{ article.title }}
