二十八
我一路返嶺大，一路同Jenny傾電話。
其實都分別左唔係好耐啫，咁快又黎料要傾電話？今日既Jenny好似好唔捨得cut線咁。（雖然正確啲黎講次次佢都係唔想cut…）
我都係有小小頂唔順，於是同佢講：「老婆大人，你唔係要溫書咩，不如比心機快啲溫好書，等聽日可以考得到好成績！」
Jenny聽到我咁講，停左一停冇出聲，之後先講：「咁你一陣又要練波，冇得傾嘛…」又係扁扁咀既聲音…
我就快要心軟架喇…
不過其實呢排住hall都傾少左電話啦，又會突然之間咁痴纏既？
仲要尋晚啱啱先響Jenny屋企過左一日夜。
唔…睇黎又係時候要出必殺技了。
「再講就會爆分鐘架喇。」我對住Jenny洗出必殺技：「太快講到爆分鐘之後就冇得繼續傾，我諗住留前鬥後架嘛。」
「咁…好啦…」Jenny唔願收線咁既語氣。
「比心機溫書，聽日個mid term要考好啲！」我為Jenny加油打氣。
「嗯，知道！」Jenny勉強打起精神。
「咁，今晚再傾啦。」
「嗯，拜拜。」Jenny依依不捨咁道別。
收線之後，我望住窗外既景色，沉思緊。
Jenny既條件咁好，我係咪應該好好裝備自己，令自己可以成為一個配得起佢既男人？至少我係咪應該都用多小小時間去溫書先呢？仲有，我係咪應該比多小小時間去同佢相處，例如至少同佢傾耐啲電話呢？
其實，響hall既每一層既common area都有一個公家電話，平時冇乜人用，但我從來冇話過比Jenny知道，因為我驚佢一知道就要我同佢喪傾電話。
而且果個電話既位置，響正每一層既lobby兼升降機出入口直望可以見到既地方，好多人出出入入，所以絕對唔係一個傾私人電話既好地方。
但最重要既，係咪我應該要同阿冰保持返小小距離？雖然話我真係冇諗過去媾佢，但如果比Jenny知道自己男朋友同另一個好靚既女仔咁close會唔會唔係幾好呢？但可能唔經唔覺阿冰響我心目中位置越黎越重，我又唔捨得唔見阿冰。
我想同阿冰保持良好關係。
做唔成情侶可以做朋友。
唉，唔理咁多嘞，唔係連自己都開始對呢段感情冇信心下嘛？
諗下諗下…不知不覺間已經到站。我拎起行李，緩緩地向自己住既hall出發。
呀，早知唔會返屋企既尋日就唔鬼帶咁多野走啦，而家原封不動咁拎啲行李返去hall…
*
返到去既時候阿熙竟然響房入面，好似係今朝早同人補完習之後就響房度等練波。
我借啲意問下佢尋日同Cathy食完tea之後有冇下文，佢就好寸咁答我：「你想有乜撚野下文吖，我既下文就係趕撚住去同人補習。屌。」
當然佢係用同朋友講笑果種寸寸貢既語氣答我既，同佢住左都差唔多兩個月，慣架喇。
不過係唔係事實得佢兩個先知喇，嘿嘿。
話說回來，阿熙淨係出去補習賺錢，都唔係好覺佢有同女朋友出街，其實係咪散左？
「話時話，你成日顧住出去賺錢，阿嫂唔會炸你型咩？」我換好練波既衫，準備同阿熙一齊出發。
「鬼叫佢嫁鳩左比個窮光蛋咩。」阿熙聳一聳肩：「唔努力啲賺錢點撚樣養佢。呢一點佢明白既。」
但係以阿熙搵錢既博命程度黎講，真係純粹賺錢黎養佢？
又唔係既，如果阿熙屋企冇乜錢供佢讀書既話，佢自己都有好多支出，加埋拍拖既洗費，先要努力啲搵錢。
我係咁諗的。
「係喎，阿嫂讀邊間U？」本來我直情係想問阿嫂幾多歲，因為上次睇相果陣我記得阿嫂望落去好似大過阿熙都幾多下。
其實可能係因為阿熙個樣太細個。
不過直接問人地女朋友幾大好似好冇禮貌，於我諗住逐啲逐啲咁打蛇隨棍上去問。
「佢？今年啱啱畢左業啦。」出乎意料地，阿熙既女朋友原來係今年既fresh grad。
「咦？咁拍拖既時候佢唔會幫手比下錢既咩？」雖然食軟飯唔係幾好，不過有陣時都要睇情況架。
真心鍾意你既，唔會因為你呢一刻仲讀緊書未搵到錢而嫌棄你，更加可能會響平時拍拖行街甚至日常生活方面幫下手出下錢添。
不過都有可能係因為阿熙同佢既外表完全唔同，係一個大男人主義既人，所以要佢洗女朋友既錢佢一定唔肯。
「屌，總之家家有本難唸的經，佢屋企既經濟狀況都唔撚係太好…」阿熙嘆道。不過佢死都要加句粗口響入面。
噢，好似問到有啲沉重既地方了。
唯有轉一轉談話既方向。
「阿嫂咁獨立都好既。我果個成要同我傾電話唔願停都幾辛苦，哈哈。」我究竟響度up緊乜鳩。
阿熙上下打量一下我，之後拍下我膊頭，說道：「有時候咁樣都幾好吖，呢啲鳩野你睇我好，我睇你好既啫，總之好好咁珍惜對方喇。」
又難得佢唔寸我講野一舊舊。
講下野又傾下計咁，我同阿熙都行到球場了。
阿熙好少同我講起佢女朋友啲野，今次雖然唔係透露左好多，但都係一個好開始。阿熙肯當我係兄弟，同我傾心事，其實令我幾開心。
不過就咁聽阿熙講佢女朋友時候既語氣，我硬係覺Cathy就算肯all in都未必搶到阿熙返黎。
不過呢啲野，由其是佢地兩個男未婚女未嫁，而且都咁大個人，真係唔到我去理。
不過如果阿熙真係察覺到Cathy既心意，我都唔介意提供意見既。
雖然Cathy係咪有心我都只係估估下。
唔諗咁多啦，又要開始練波了。
（待續）
留言列表
{{ article.title }}
