二十二
阿熙好快就沖完涼。
佢走果陣阿東有問佢:「我地一陣成隊去食tea，你黎唔黎？」
我口快快咁幫佢答左:「有靚女請佢食tea，佢先唔會同你班麻甩佬食呀～」
「Woo~~~」「邊個靚女呀？」「有女約就唔要隊友了!」「食撚屎啦有異性冇人性！」更衣室入面成班裸男起哄。
阿熙一下拍左落我個頭度，同我講:「收皮喇屌鳩你!」之後解釋:「我純粹係因為有免費野食先去咋。」
我哈哈一笑，不過都唔介意比佢打我個頭。
阿東之後轉頭問我:「阿威，你join唔join我地呀？」
同隊友們去食tea，真係男人的浪漫…雖然都好想去，不過要趕住返去陪Jenny，所以唯有拒絕吧。
況且今朝先同佢地食過brunch黎，之後仲有大把機會既。
雖然同Jenny講明去同隊友食tea既話佢就絕對唔會唔放人…不過我要盡個好男友既責任，要快啲返去陪佢先!
「唔啦，要趕返去陪女朋友。」我答。
「食屎啦又係有異性冇人性。」「你兩個太令人失望啦…」「出面條龍門柱happy Corner啦！」裸男們又一次起哄。雖然佢地講得好仆街，不過語氣其實係同我地玩既，所以我同阿熙都冇乜野。
「下次啦咁。」阿東拍下我膊頭。
「隊長…」
「係？」
「你隻腳點呀？」我問。
阿東苦笑左下，答:「唔知呀，可能聽日去睇醫生啦。」之後跛下跛下咁走返去隊友堆度。
呃，希望唔好太嚴重啦。
話時話，我地既更衣室氣氛都幾和諧下，啱啱先比人大炒完，大家除左完場果下垂頭喪氣之外，沖完涼之後大家已經談笑風生。
唔係爭標份子又真係冇乜壓力既。
黎緊呢三年好好享受下快樂足球吧。
*
返到hall執埋小小野，之後就準備起程返屋企。
正當我帶住比完賽之後疲累既身軀準備離開我間房既時候，電話突然間響起黎。我望一望來電顯示，係阿冰？
「點呀，Camp花？」我一拎起個電話就咁講。
「冇事搵下你傾計唔得咩？Camp草！」阿冰最近開始稱呼我為Camp草。當然我好有自知之明，我副尊容最多只係副正常人樣，最多叫做順眼，係大隻小小、高大小小，距離Camp草呢個稱號爭十萬八千里。阿冰係因為我開口埋口都叫佢Camp花所以先會咁樣稱呼返我。
哈，好有打情罵俏feel呢。
我應返佢:「梗係得啦，同你傾電話，my pleasure~」
「呵呵~」阿冰把聲聽落笑意盈盈:「Camp草今晚響唔響hall呀？」
「唔呀，應承左女朋友今晚陪佢。」如果我響hall你係咪請我上去打返場友誼波先~
咪發夢啦。
「噢…仲想今晚搵你食飯添…」阿冰把聲有小小失望…
我諗起阿冰今日都冇返屋企，而係黎左睇我地比賽，於是問力:「今日難得星期六喎，唔駛陪你個未來律師男朋友咩？」
「唉，唔好提啦，佢話上莊同埋讀書好忙，今個禮拜都抽唔到時間陪我喎…」一提起男朋友，阿冰把聲更加無精打采。
聽到camp花失落把聲叫我於心何忍呢，於是我同佢講:「晚餐就唔得啦，而家得唔得閒食個tea吖？」
對唔住呀Jenny，為夫要遲小小先返黎喇。
阿冰聽到之後把聲即刻精神返:「好，照殺！嘻嘻～Camp草真係好人！」
「哈哈，唔駛賣口乖啦～咁我地去邊度食呀？」
「不如遠小小喇。」阿冰續道:「我驚撞到Cathy媽媽佢地。」
「都係，咁你想去邊度食？」我除左驚撞到阿熙同Cathy之外，仲驚撞到班隊友。佢地口沒遮攔，一陣講左啲衰野比阿冰聽到就費事喇。
「唔…我諗下先，一陣見到面先講？」
「我行得架喇，咁響你hall樓下等啦。」
「等我10分鐘。」阿冰說道。
「唔好遲到呀！」我諗起約阿冰佢冇一次唔遲。
「冇問題！」答得咁口爽，係咪真係冇問題架…
「咁陣間見啦。」
之後我打一打比Jenny先。
「喂？」
「老公~今日比賽點呀？」Jenny一聽到係我把聲即刻問我。
「唉，輸左喇。對手好勁，仲要大敗添。」一講起呢個話題我有啲頹。
「唔緊要啦～你尋日都話過對面好勁架嘛。咁你有冇踢呀？」Jenny安慰下我。
「有呀，後備出黎踢左陣。」
「有得出場好勁呀～」Jenny好似都替我高興，之後用小小失望既語氣講:「不過可惜我黎唔到睇…下次，一定黎睇老公比賽~」
「咁我都係因為有隊友受左傷先可以出場啫，下次黎到未必有得出架啦！」
「冇得出我咪陪你一齊坐囉～」我聽到心下一甜。
「我坐響後備席架喎。」
「咁我咪響觀眾席陪你坐。」
「傻妹，悶親你呀。」
「望住你我點都唔會悶架啦。」比Jenny搞到我個心越黎越甜…
呀，差啲醒唔起我打比Jenny既原因添。
「呀，係喎，我而家去同啲隊友食個tea，食完之後即刻過黎搵你!」我講左個大話。
「唔緊要啦，你慢慢同佢地食，你地比完賽實好多野講~」Jenny好順攤。
「嗯…咁今晚見喇，我啲隊友都等緊我。」
「嗯，今晚見~」Jenny講今晚見既時候既語氣好似幾開心。
用班隊友過橋好似好衰咁。
…
其實唔係，係對住Jenny講大話好似好衰先啱。不過冇理由坦白同佢講我同camp花兩個人拋低晒啲隊友去撐枱腳架嘛。
費事佢亂諗啦，係咪？
（待續）
留言列表
{{ article.title }}
