OCAMP故.jpg

 

 

傾計傾到開始冇話題既時候,獸父Simon提議下玩非洲話事啤。

 

我以前同中學時候既朋友去camp既時候玩過類似既遊戲,所以大約知道係啲咩黎。

 

簡單黎講,就係好似響日劇或者日漫入面出現既國王遊戲咁,輸左既玩家要接受贏家既一啲懲罰。

 

遊戲規則其實就好簡單,首先將啤牌入面既兩張Joker都抽出黎先,然後參加遊戲既人每人響副啤牌度抽一張牌出黎,自己唔準睇,然後放響自己既額頭上面(換句話講,即係額頭上面張牌係乜,其實除左自己之外其他參加者都知道。)。參加者之後輪流講一樣懲罰出黎,講晒之後大家show額上既牌出黎,通常牌面最大果個就贏,牌面最細既就係輸。輸家就要執行贏家所訂下既懲罰。當然,大家可以訂立其他規則去定輸贏啦。

 

其實比起響樓上cafe玩,呢個遊戲啱響o camp玩多啲。不過果陣應該冇人有帶啤牌,所以組爸組媽冇人提出黎玩。

 

獸父Simon向大家講解左規則一次,之後問:「好簡單啫,係咪?」

 

順帶一提,獸父Simon訂立既規則係最簡單果隻:牌面最大贏,牌面最細就輸。

 

玩呢隻遊戲,其實都幾有趣,所以大家好快就贊成一齊玩。

 

我望一望大家,大家都係大學生,係斯文人黎既,我估大家訂立既懲罰應該都唔會太難做。

 

*

 

痴線。

 

有啲人其實真係睇唔出佢咁變態。

 

肥仔賢竟然連輸左要食屎呢種懲罰都諗得出。佢仲要指明最細牌果個輸家要食由第二細牌果個屙出黎既屎。

 

佢講果陣唔知有冇諗過自己真係會贏呢?

 

結果?佢真係贏左呀!

 

我幾驚自己係兩位輸家其中一個。就算要做屙屎果個老實講我都接受唔到…

 

如果要我屙屎比阿冰食…

 

屌,痴撚線,諗都咪諗呀!

 

唉,賢哥呀賢哥,做乜好玩唔玩要玩屎呢?

 

我望一望自己隻牌,紅心J,安全。輸既係阿龍,我地組另一個男仔,佢係階磚5。至於另一位輸家就係獸父Simon,係葵扇5。換句話說,即係阿龍哥要去品嚐獸父既排泄物…

 

我望一望肥仔賢,佢肥大兼油光滿面既臉容上笑淫淫咁,一副等睇好戲既樣,完全唔似會收回成命。

 

雖然話願賭服輸啫,但玩到咁大,正常人都唔會認數。仲有,唔知肥仔賢驚唔驚佢呢兩位同組會反面走過去打鳩佢呢?

 

結果點收科?

 

都話左大家都係大學生,係斯文人黎,響徇眾要求既情況下,肥仔賢勉為其難咁同意個懲罰由食屎變做食鼻屎。

 

屌,咪都係咁核突。

 

見住龍哥果副食到反胃既樣,他朝君體也相同呀肥仔賢。

 

另外,我地又試過捉住肥妹Yuki去Happy Corner。當然我地都有就住佢既。

 

提出呢個懲罰既係Amanda。佢似乎好想見識下男仔比人con時既樣,所以佢知道係Yuki輸果下難掩失望之情。

 

順帶一提,Yuki真係好重。

 

阿熙既懲罰好有趣。佢要輸家請佢食一餐飯,結果下次Alan要同佢撐枱腳。Alan肯既,至少比食屎好得多。

 

嗯,唔知佢有冇諗過如果係同獸父Simon食飯係點呢?不過獸父Simon應該會反口唔認數啦 

 

至於我有冇中過招?梗係有喇。我果round比成班麻甩佬夾住入廁所除左我隻鞋放我隻腳落個沖水馬桶度玩沖浪。

 

嗚。

 

不過最離譜其實係獸父Simon。

 

佢由頭到尾提議既懲罰都係輸家要同贏家接吻。雖然考慮埋佢都有要同組仔打茄輪既風險,呢個勇氣值得佩服,但佢既目的都係想抽組女們既水。

 

唔怪得佢提議玩非洲話事啤啦,原來早有準備。

 

佢係做到咁明目張膽,但係好野既係一路玩佢一路無視住組女們既厭惡表情,依然故我咁提出佢既「懲罰」。

 

如果臉皮厚都係優點既話,呢個可能係獸父Simon既唯一一個優點。

 

不過好彩既係,獸父既運氣真係唔係幾好,佢玩左咁耐一鋪都冇贏過。

 

「哈哈!今次仲唔到我贏?」獸父叫左出黎。

 

咦?就講就中?

 

「等我睇下你地邊個輸先…嘿嘿嘿。」討厭既笑聲。

 

希望係肥仔賢輸。諗起獸父同肥仔打茄輪都真係幾過癮,到時你就真係嘿嘿嘿嘞。

 

「…係我。」坐響獸父Simon隔離既阿冰緩緩咁舉起手上隻牌…紅心5。

 

WTF!?

 

莫非獸父 Simon 儲埋啲運氣就係而家一次過用!?

 

「咁…」獸父Simon一臉淫笑咁望住阿冰,本身佢個樣已經夠猥瑣,而家直情係又猥瑣又淫賤,成個日本啲電車痴漢咁。而阿冰望落去個樣睇黎好唔情願咁,咀都扁埋。

 

嗯…唔得,要做啲野幫下阿冰先得。

 

一拳打落組爸度打柒佢?唔得,一陣搞大左件事,獸父走去報警我咪大鑊?Re u re到比人拉…

 

獸父個咀開始移近阿冰度…

 

不如我開聲鬧佢抽水?不過阿冰自己都未出聲,我又唔係佢邊個…

 

獸父個咀又移近多小小…

 

唔得,一定要制止佢…

 

我突然霍一聲企起身,聲音有啲大,獸父Simon停左落黎望住我。我一言不發咁走埋去,望一望佢,之後一野錫埋去。

 

屌,佢個口好臭。

 

咀唇分開。

 

全場靜晒。

 

 

阿熙第一個噗一聲笑出黎:「哈哈…你做乜鳩呀…哈…」佢好似笑到標眼水。

 

阿熙呢下笑聲引發埋其他人一齊大笑(當然除左獸父)。

 

我企左響度,有啲發呆。屌你老母,啱啱乜都冇諗就好自然行動左起黎添。

 

(待續)

arrow
arrow

    葉開葉開 發表在 痞客邦 留言(0) 人氣()